Астана. 12 ақпан. ИНТЕРФАКС-ҚАЗАҚСТАН – Қазақстан Парламенті Сенатының депутаттары бейсенбі күнгі жалпы отырыста Еуразиялық экономикалық одақ (ЕАЭО) және оған мүше мемлекеттер мен Моңғолия арасындағы уақытша сауда келісімін ратификациялау туралы заңды мақұлдады.
Бұған дейін құжат Мәжілісте қабылданған болатын. Осылайша, заң Парламент тарапынан толық қабылданып, Президенттің қол қоюына жолданды.
ЕАЭО мен Моңғолия арасындағы келісім 2025 жылғы 27 маусымда Минскіде қол қойылған.
Құжаттың негізгі мақсаты – ЕАЭО елдері мен Моңғолия арасындағы сауда-экономикалық байланыстарды дамыту және нығайту, сондай-ақ қазақстандық тауарлардың Моңғолия нарығына шығуына қолайлы жағдай жасау.
Келісім аясында тараптар шектеулі тауарлар тізбесі бойынша еркін сауда режимін енгізу, импорттық кедендік баждарды төмендету немесе жою жөнінде тарифтік міндеттемелер алады. Сонымен қатар, 1994 жылғы Тарифтер мен сауда жөніндегі бас келісім нормаларына сәйкес ұлттық режимді қолдану құқығы сақталады.
Құжатта техникалық реттеу, санитариялық және фитосанитариялық шараларды Дүниежүзілік сауда ұйымы талаптарына сәйкес жүзеге асыру міндеті де көзделген.
Сауда және интеграция вице-министрі Жанель Кушукованың айтуынша, келісім 367 тауар позициясы бойынша импорттық кедендік баждарды алып тастауды көздейді. Құжат үш жылға жасалып, автоматты түрде тағы үш жылға ұзартылады. Ал алғашқы үш жылдық кезең аяқталған соң тараптар толыққанды еркін сауда келісімін жасау жөнінде келіссөздерді бастайды.
