Астана. 22 қаңтар. ИНТЕРФАКС-ҚАЗАҚСТАН – Қазақстан Парламентінің Сенаты бейсенбі күні өткен пленарлық отырыста «Қазақстан Республикасы Үкіметі мен Моңғолия Үкіметі арасындағы зейнетақы саласындағы ынтымақтастық туралы келісімді ратификациялау туралы» заңды мақұлдады.
Аталған заң бұған дейін Мәжілісте қабылданған болатын. Осылайша, құжат Парламентпен толық қабылданып, енді Мемлекет басшысының қол қоюына жолданады.
Келісім 2024 жылғы қазанда Улан-Батор қаласында қол қойылған. Сенаттың әлеуметтік-мәдени даму және ғылым комитетінің қорытындысына сәйкес, келісім азаматтарға ортақ зейнетақы тағайындау мәселелерін реттейді және әскери қызмет, сондай-ақ жоғары және арнаулы орта білім беру ұйымдарында оқу кезеңдерін еңбек өтілі ретінде өзара тануды көздейді.
Құжатта екі ел аумағында зейнетақы төлемдерін тағайындау үшін қажетті еңбек өтілін растау тәртібі белгіленген.
Сонымен қатар, Қазақстан мен Моңғолия арасындағы жаңа ынтымақтастық бағыты ретінде Қазақстаннан жинақтаушы зейнетақы бөлігін экспорттау мүмкіндігі қарастырылуда.
Заңның қабылдануы азаматтардың әлеуметтік кепілдіктері мен құқықтарын нығайтуға, сондай-ақ екі ел арасындағы өзара сенімді арттыруға ықпал етеді деп көрсетілген комитеттің қорытындысында.
