Астана. 12 ақпан. ИНТЕРФАКС-ҚАЗАҚСТАН – Қазақстан Парламенті Сенаты бейсенбі күнгі жалпы отырыста Қазақстанның Қырғыз Республикасының Ыстықкөл облысы аумағында орналасқан курорттық-рекреациялық нысандарға меншік құқығын реттеу жөніндегі 2006 жылғы 4 шілдедегі үкіметаралық келісімді және оған өзгерістер мен толықтырулар енгізу туралы хаттаманы ратификациялау туралы заңды мақұлдады.
Келісімге сәйкес, Қазақстанға төрт курорттық-рекреациялық нысанға меншік құқығы бекітіледі. Олар: «Қазақстан» шипажайы, әл-Фараби атындағы Қазақ ұлттық университетінің «Университет» спорттық-сауықтыру лагері, «Самал» демалыс үйі және «Олимп» спорттық-сауықтыру орталығы» РМК-ның спорттық-сауықтыру базасы.
Құжатқа сәйкес, қазақстандық тарап аталған нысандарды (спорттық базаны қоспағанда) төрт жыл ішінде, яғни 2029 жылдың соңына дейін үш және төрт жұлдызды қонақүй деңгейіне жеткізу жөніндегі міндеттемесін ұзартты.
Келісімге енгізілген өзгерістер туралы хаттамада бұл міндеттемелерді орындау мерзімін 2029 жылғы 31 желтоқсанға дейін ұзарту және оларды іске асыру үшін инвесторларды тарту мүмкіндігі көзделген.
Сенат сондай-ақ Қырғызстанмен Ыстықкөл облысының Ыстықкөл ауданында орналасқан жер учаскелерін жалға беру туралы 2009 жылғы 1 желтоқсандағы үкіметаралық шартты және оған өзгерістер мен толықтырулар енгізу туралы хаттаманы ратификациялау туралы заңды мақұлдады.
Аталған шартқа сәйкес, Қазақстан тарапы 49 жыл мерзімге жалдау негізінде төрт нысан орналасқан жер учаскелерін уақытша пайдалануға алған. Бұл нысандар – Қазақ КСР кезеңінде салынған шипажай, екі демалыс үйі және спорттық-сауықтыру базасы.
Шартта Қазақстанның Ыстықкөл облысындағы курорттық-рекреациялық нысандарға меншік құқығын реттеу жөніндегі келісімде белгіленген міндеттемелерді орындау қарастырылған.
Құжат мәтініне енгізілген өзгерістер Қазақстан тарапына бұрын қабылданған міндеттемелерді орындау үшін инвесторларды тартуға мүмкіндік береді.
Бұған дейін екі заң да Мәжіліс тарапынан қабылданған. Осылайша, олар Парламент тарапынан толық мақұлданып, Президенттің қол қоюына жолданады.
