АСТАНА. 25 шілде. ИНТЕРФАКС – Қазақстан Республикасының Президенті Қасым-Жомарт Тоқаев 29 шілдеде Түркия Республикасына ресми сапармен барады. Бұл туралы Мемлекет басшысының баспасөз қызметі жұма күні хабарлады.
Ресми ақпаратта: «29 шілдеде Президент Қасым-Жомарт Тоқаев Түркия Президенті Режеп Тайып Ердоғанның шақыруымен Анкара қаласына ресми сапармен барады», – делінген.
Сапар аясында Қазақстан мен Түркия арасындағы стратегиялық әріптестікті одан әрі нығайтуға бағытталған мемлекет басшыларының келіссөздері өтеді.
Сонымен қатар, Қасым-Жомарт Тоқаев пен Режеп Тайып Ердоған Қазақстан мен Түркия арасындағы Жоғары деңгейдегі стратегиялық ынтымақтастық кеңесінің бесінші отырысына төрағалық етеді.
