Астана. 19 ақпан. ИНТЕРФАКС-ҚАЗАҚСТАН — Қазақстан Президенті Қасым-Жомарт Тоқаев жұмыс сапарымен Вашингтонға келді. Бұл туралы бейсенбі күні Мемлекет басшысының баспасөз қызметі хабарлады.
Хабарламада атап өтілгендей, сапар аясында Тоқаев Бейбітшілік кеңесінің алғашқы отырысына қатысып, шет мемлекеттердің көшбасшыларымен, сондай-ақ АҚШ-тың ресми тұлғаларымен бірқатар кездесу өткізеді.
Вашингтонда Президент АҚШ-та тұрып жатқан және білім алып жүрген Қазақстан азаматтарымен кездесті. Әңгімелесу барысында ол жас буынға үлкен үміт артатынын айтып, мемлекет жастардың дамуына және олардың өзін-өзі жүзеге асыруына жағдай жасау мәселесіне ерекше мән беретінін атап өтті.
Өз кезегінде студенттер мен жас зерттеушілер ғылым мен білім саласына көрсетіліп отырған жан-жақты қолдау үшін Тоқаевқа алғыс білдірді.
Қазақстан АҚШ президентінің бастамасымен құрылған Бейбітшілік кеңесіне биыл қаңтар айында Швейцарияның Давос қаласында құрылтайшы мемлекет ретінде қосылған болатын.
Бейбітшілік кеңесін құру Трамп ұсынған Газа секторындағы қақтығысты тоқтатуға бағытталған жоспардың бір бөлігі болып табылады.
