Астана. 17 ақпан. ИНТЕРФАКС-ҚАЗАҚСТАН — Қазақстан Президенті Қасым-Жомарт Тоқаев «Бір тараптан Еуразиялық экономикалық одақ және оған мүше мемлекеттер мен екінші тараптан Моңғолия арасындағы уақытша сауда келісімін ратификациялау туралы» заңға қол қойды. Бұл туралы Мемлекет басшысының баспасөз қызметі хабарлады.
Бұған дейін хабарланғандай, ЕАЭО мен Моңғолия арасындағы келісімге 2025 жылғы 27 маусымда Минск қаласында қол қойылған.
Келісімнің негізгі мақсаты — ЕАЭО елдері мен Моңғолия арасындағы сауда-экономикалық байланыстарды дамыту және нығайту, сондай-ақ қазақстандық тауарларды Моңғолия нарығына ілгерілету үшін қолайлы жағдай қалыптастыру.
Құжатта тарифтік міндеттемелер көзделген. Атап айтқанда, тараптар тауарлардың шектеулі тізбесі бойынша еркін сауда режимін енгізеді, импорттық кедендік баждарды төмендету немесе алып тастау қарастырылады. Сонымен қатар, 1994 жылғы Тарифтер мен сауда жөніндегі бас келісім нормаларына сәйкес ұлттық режимді қолдану құқығы бекітілген.
Сондай-ақ келісім тараптардың техникалық реттеу, санитариялық және фитосанитариялық шараларды Дүниежүзілік сауда ұйымының қағидаларына сәйкес қолдануын міндеттейді.
Бұған дейін Сауда және интеграция вице-министрі Жанель Күшукова келісім 367 тауар позициясы бойынша импорттық кедендік баждарды алып тастауды көздейтінін, оның үш жыл мерзімге жасалып, автоматты түрде тағы үш жылға ұзартылатынын мәлімдеген болатын. Ал алғашқы үш жылдық кезең аяқталғаннан кейін толыққанды еркін сауда туралы келісім жасау жөніндегі келіссөздер басталатыны жоспарланып отыр.
