Астана. 17 ақпан. ИНТЕРФАКС-ҚАЗАҚСТАН — Қазақстан алдағы жылдары астықты терең өңдеу саласында жалпы құны 1,9 трлн теңгені құрайтын алты инвестициялық жобаны жүзеге асыруды жоспарлап отыр. Бұл туралы Үкімет отырысында Ауыл шаруашылығы министрі Айдарбек Сапаров мәлімдеді.
«Астықты терең өңдеу бағыты қарқынды дамып келеді. Қазіргі уақытта республикада қуаты 500 мың тоннадан асатын үш кәсіпорын жұмыс істейді, олар глютен, биоэтанол және крахмал өнімдерін өндіреді. Алдағы үш жылда жалпы сомасы 1,9 трлн теңге болатын алты инвестициялық жобаны іске асыру жоспарлануда», — деді министр.
Оның айтуынша, өндірілетін өнім түрлері глутамат, треонин, лейцин және лизин секілді өнімдер есебінен кеңейтіледі.
Аталған жобалар Түркістан, Жамбыл, Ақмола және Қостанай облыстарында, сондай-ақ Астана қаласында жүзеге асырылмақ.
17 ақпандағы ресми валюта бағамы — 1 АҚШ доллары 491,97 теңге.
