Астана. 19 ақпан. ИНТЕРФАКС-ҚАЗАҚСТАН – 2025 жылдың қорытындысы бойынша Қазақстан мен Үндістан арасындағы тауар айналымы 923,3 млн долларды құрады, Астана экспорт көлемін 150 млн долларға арттыруға дайын екенін республиканың Премьер-министрінің баспасөз қызметі хабарлады.
Хабарламаға сәйкес, Қазақстан Үкіметінің басшысы Олжас Бектенов Үндістан Премьер-министрі Нарендра Модимен келіссөздер жүргізіп, сондай-ақ India AI Impact Summit 2026 саммитіне қатысты. Тараптар сауда және инвестиция, энергетика, агроөнеркәсіптік кешен, цифрландыру және жасанды интеллект салаларындағы ынтымақтастықты дамыту мәселелерін талқылады.
«Қазақстан 40 тауар позициясы бойынша өнім жеткізілімін 150 млн долларға дейін ұлғайтуға дайын. Сондай-ақ аса маңызды минералдар мен сирек жер элементтері, ғарыш және қорғаныс өнеркәсібі салаларындағы өзара іс-қимылды кеңейтудің елеулі әлеуеті атап өтілді», – делінген келіссөздер қорытындысы бойынша хабарламада.
India AI Impact Summit 2026 алаңында Қазақстан Премьер-министрі озық технологияларды дамыту бағытында әлемдік технологиялық компанияларды ынтымақтастыққа шақырды.
Бұған дейін Қазақстанның Өнеркәсіп және құрылыс министрлігі хабарлағандай, 2024 жылы Қазақстан мен Үндістан арасындағы тауар айналымы 974,9 млн долларды құраған. Осылайша, көрсеткіш 5,3%-ға төмендеген.
