Астана. 19 ақпан. ИНТЕРФАКС-ҚАЗАҚСТАН – Қазақстан Парламентінің Сенаты бейсенбі күні өткен пленарлық отырыста «Қазақстан Республикасының Үкіметі мен Қытай Халық Республикасының Үкіметі арасындағы жаңартылатын энергия көздері саласындағы жобаларды іске асыру туралы келісімді ратификациялау туралы» заңды мақұлдады.
Аталған заң бұған дейін Мәжілісте қабылданған болатын, осылайша ол тұтастай Парламент қабылдаған құжат ретінде Президенттің қол қоюына жолданады.
Бұған дейін Энергетика министрі Ерлан Ақкенженов келісім аясында жалпы қуаты 1,8 ГВт болатын ірі инвестициялық жобаларды жүзеге асыру көзделгенін мәлімдеген. Оның ішінде жиынтық қуаты 1,5 ГВт болатын үш жел электр станциясын және қуаты 0,3 ГВт болатын бір күн электр станциясын салу қарастырылған.
Жобалар Қарағанды, Түркістан және Павлодар облыстарында іске асырылады. Бұл өңірлердің таңдалуы олардың жел және күн энергетикалық әлеуетінің жоғары болуымен, сондай-ақ жаңа қуаттарды республиканың бірыңғай энергетикалық жүйесіне техникалық тұрғыда тиімді біріктіру мүмкіндігімен байланысты.
Жобаларды аяқтау мерзімі 2027–2029 жылдарға жоспарланған.
Инвестициялардың жалпы көлемі 2,2 млрд АҚШ долларын құрайды, қаржыландыру халықаралық қаржы институттары мен банктердің қатысуымен жүзеге асырылады. Қазақстан тарапынан бірлескен инвестор ретінде «Самұрық-Энерго» АҚ қатысады.
Жобаларды іске асыру нәтижесінде 100-ден астам тұрақты және шамамен 1,5 мың уақытша жұмыс орны ашылып, жыл сайын қосымша 5,7 млрд кВт/сағ-тан астам «жасыл» электр энергиясын өндіру қамтамасыз етіледі.
