Астана. 19 ақпан. ИНТЕРФАКС-ҚАЗАҚСТАН – Қазақстан Ұлттық банкі Үкіметпен бірлесіп бюджет қаражаты мен квазимемлекеттік сектор қаражатын цифрлық теңгені пайдалануға кезең-кезеңімен көшіру жөніндегі іс-шаралар жоспарын әзірледі, деп хабарлайды агенттік тілшісі.
«Қазіргі уақытта Үкіметпен бірлесіп бюджет қаражаты мен квазимемлекеттік сектор қаражатын цифрлық теңге арқылы пайдалануға көшіру бойынша іс-шаралар жоспары әзірленді», – деді Ұлттық банк төрағасының орынбасары Берік Шолпанқұлов бейсенбі күні Сенаттағы дөңгелек үстелде.
Оның айтуынша, бүгінгі күні цифрлық теңгені Атырау және Павлодар облыстарында автожолдар салу кезінде, сондай-ақ фермерлерді кредиттеу және субсидиялау бағыттарында қолдану жобалары аяқталған.
«Сонымен қатар Ұлттық банктің жабдықтар мен бағдарламалық қамтамасыз етуді сатып алу рәсімдерінде, сондай-ақ экспорттаушыларға ҚҚС қайтаруды әкімшілендіру саласында цифрлық теңгені пайдалану жұмыстары жалғасуда», – деп түсіндірді Ұлттық банк басшысының орынбасары.
Шолпанқұловтың сөзінше, аталған жобаларды іске асырудың негізгі тетігі – цифрлық теңгенің бағдарламаланатын мүмкіндіктерін қолдану.
Ол өткен жылы цифрлық теңге ұлттық валютаның жаңа нысаны ретінде танылғанын еске салды. Онымен жүргізілетін барлық операциялар арнайы платформа арқылы жүзеге асырылады. Цифрлық теңгені айналымға Ұлттық банк шығарады, платформаны басқарады және қатысушыларды қосады. Ал банктер азаматтар мен компаниялар үшін цифрлық шоттар ашады және жүргізеді. Сондай-ақ цифрлық теңге негізінде төлемдерді бағдарламалау және смарт-келісімшарттар құру мүмкіндігі енгізілген.
«Цифрлық теңгенің пилоттық жобасы 2023 жылдан бастап Ұлттық банк пен Үкіметтің бірлесуімен іске асырылып келеді. Оның аясында цифрлық теңгені шығару және өтеу, цифрлық шоттар ашу, төлемдер мен аударымдарды жүзеге асыру сияқты базалық төлем сценарийлері енгізілді», – деп қосты Шолпанқұлов.
Бұдан бөлек, қажетті құқықтық база қалыптастырылып, Үкіметпен бірлесіп кредиттеу, субсидиялау, инфрақұрылымдық жобаларды іске асыру және салықтық әкімшілендіру салаларында бюджет қаражатының жұмсалу ашықтығын арттыруға бағытталған пилоттық жобалар іске қосылған.
Осылайша, Шолпанқұловтың айтуынша, цифрлық теңге платформасы мемлекеттік қаржы саласында кең ауқымда қолдануға дайын.
