Астана. 12 қаңтар. ИНТЕРФАКС–ҚАЗАҚСТАН — 2025 жылы Қазақстанның тұжырымдамалық ішкі жалпы өнімі (ЖІӨ) 6,5 пайызға өскенін Ұлттық экономика министрлігінің баспасөз қызметі хабарлады.
Министрлік мәліметінше, ел экономикасының өсіміне негізгі үлесті өнеркәсіп, көлік, құрылыс және сауда салалары қамтамасыз етті.
Жыл қорытындысы бойынша өнеркәсіп өнімінің индексі 7,4 пайызды, өңдеу секторы 6,4 пайыздық өсімді көрсетті.
«Бұл көрсеткіштер азық-түлік өнімінің өндірісі 8,1 пайызға, мұнай өңдеу өнімдері 5,9 пайызға, химия өнеркәсібінің өнімдері 9,8 пайызға, металлургия 1,2 пайызға, машина жасау өнімдері 12,9 пайызға ұлғайғанымен байланысты», — делінген дүйсенбіде таратылған хабарламада.
Көлік пен қоймалау саласы 20,4 пайыздық, құрылыс саласы 15,9 пайыздық, ал сауда саласы 8,9 пайыздық өсім көрсеткені айтылады.
«Ауыл шаруашылығы, орман шаруашылығы және балық шаруашылығында көрсеткіштер 5,9 пайызды құрады. Бұл өсім негізінен өсімдік шаруашылығындағы 7,8 пайыз және мал шаруашылығындағы 3,3 пайызға өсім нәтижесі. Ақпарат және байланыс саласы 3,6 пайызға өсті», — деп нақтылады ведомство өкілдері.
Сондай-ақ бұрынырақ Президент Қасым-Жомарт Тоқаев «Түркістан» газетіне берген сұхбатында 2025 жылы Қазақстан экономикасы 6 пайыздан астам өсіп, ЖІӨ көлемі 300 млрд АҚШ долларынан асқанын мәлімдеген еді.
Алдын ала мәлімет бойынша, 2025 жылдың қаңтар–қараша айларында ЖІӨ өсімі 6,4 пайызды құраған. Тұрақты комиссия мүшесі – Премьер-министрдің орынбасары, ұлттық экономика министрі Серик Жұманғариннің айтуынша, 2025 жылғы ЖІӨ өсімі 6,3–6,5 пайыз деңгейінде күтілген.
2024 жылы Қазақстанның ЖІӨ өсімі 4,8 пайыз болған.
