Астана, 31 наурыз. ИНТЕРФАКС – Қазақстанда жүргізушісіз көліктерге арналған пилоттық жоба іске қосылуы жоспарланып отыр. Бұл туралы вице-премьер – жасанды интеллект және цифрлық даму министрі Жаслан Мадиев мәлімдеді.
Оның айтуынша, жоба халықаралық технологиялық компаниялардың қатысуымен жүзеге асырылады және оны іске қосу мерзімі 2026 жылдың екінші тоқсанына белгіленген.
Сонымен қатар, жеке бастама аясында жеткізу қызметіне арналған дрондарды енгізу бойынша пилоттық жоба да жүзеге асырылып жатыр.
Вице-премьердің сөзінше, бұл бастамалар қалалық мобильділік пен логистиканың жаңа үлгілерін сынақтан өткізуге мүмкіндік береді.
Бұған дейін Астанада 2026 жылдан бастап мемлекеттік органдар мен Yandex Qazaqstan қатысуымен жүргізушісіз такси қызметін кезең-кезеңімен енгізу жоспарланып отырғаны хабарланған.
Жоба аясында тәулік бойы диспетчерлік қызметпен байланыс және сапарларды сақтандыру қарастырылған. Ал басқару жүйесі жасанды интеллектке негізделген автономды жүргізу технологиялары мен жол жағдайын бақылау жүйелеріне сүйенеді.
