АСТАНА. 22 шілде. ИНТЕРФАКС-ҚАЗАҚСТАН – Қазақстан алдағы жылдары бірқатар ірі кен орындарын іске қосу арқылы мыс кенін өндіру көлемін екі есеге – жылына 300 млн тоннаға дейін ұлғайтуды жоспарлап отыр. Бұл туралы Индустрия және құрылыс вице-министрі Олжас Сапарбеков Үкімет отырысында мәлімдеді.
«Айдарлы, Көксай және Бенкала кен орындарының пайдалануға берілуі есебінен мыс кенінің өндірісі екі есеге артады немесе 300 млн тоннаға жетеді», – деді ол.
Сондай-ақ, темір кенін өндіру көлемі 40%-ға артып, 52 млн тоннаға дейін жетпек. Бұл көрсеткішке Qarmet компаниясының ішкі қайта өңдеу көлемін арттыруы және жаңа жобаларды іске қосуы арқылы қол жеткізілмек.
Вице-министрдің мәліметінше, аталған шаралар мыс өндірісін 1,2 млн тоннаға, ыстық брикеттелген темірді 5 млн тоннаға, ал болат өндірісін 13 млн тоннаға дейін жеткізуге мүмкіндік береді.
Сапарбековтің айтуынша, 2030 жылға қарай өндірілетін түсті металдардың айтарлықтай бөлігі ел ішінде өңделіп, қосылған құны жоғары өнімге айналмақ.
«Болжам бойынша, ішкі нарықта өңделетін мыс көлемі 91 мың тоннаға, алюминий – 163 мың тоннаға, қорғасын – 81 мың тоннаға дейін жетеді», – деді ол.
Бенкала кен орны Ақтөбе облысында орналасқан. Жоба операторы – «Бенкала» кен компаниясы» АҚ. Компания акцияларының 70%-ы ресейлік азамат Наталья Смирноваға тиесілі AMROS GROUP B.V. компаниясына тиесілі. Қалған 20% кәсіпкер Владимир Жұманбаевқа, ал 10% директорлар кеңесінің төрағасы Д.М. Оразаевқа тиесілі.
Айдарлы кен орны Абай облысында орналасқан. Жобаны «Aidarly Project» АҚ іске асыруда. Компанияның 68,95% акциясы «Қазақмыс» корпорациясына, 31,05% – Нидерландта тіркелген Aidarly B.V. компаниясына тиесілі. Кен орнында 5,87 млн тонна мыс, 14,1 тонна алтын және 2 168 тонна күміс бар. Жалпы қоры – 53 млрд тонна кен.
Коксай кен орны Жетісу облысында орналасқан. Оператор – «Қазақмыс» құрамындағы «Консолидированная строительная горнорудная компания» ЖШС. Алдын ала бағалауларға сәйкес, кен орнында 3,5 млн тонна мыс, 63,7 тонна алтын және 865 тонна күміс бар. Жалпы қор – 823,7 млн тонна кен.
«Қазақмыс» корпорациясы 2026 жылы Коксайда, 2027 жылы Айдарлыда жылдық қуаты 50 млн тонна болатын тау-кен байыту комбинаттарын салуды жоспарлап отыр. Аталған жобаларға шамамен 2,1 трлн теңге инвестиция құю көзделген.
