Астана. 10 наурыз. ИНТЕРФАКС-ҚАЗАҚСТАН – Қазақстан президенті Қасым-Жомарт Тоқаев сейсенбі күні Денсаулық сақтау министрі Ақмарал Әлназарованы қабылдады. Кездесу барысында министр елдегі денсаулық сақтау жүйесінің қазіргі жағдайы мен оны дамыту перспективалары туралы баяндады, деп хабарлады мемлекет басшысының баспасөз қызметі.
«Әлназарова негізгі медициналық-демографиялық көрсеткіштер туралы мәлімет берді. Жалпы және нәресте өлім-жітімі 15,3%-ға төмендеп, тұрақты оң динамика байқалуда. Қазақстан жұқпалы емес аурулардан болатын мезгілсіз өлімді 25%-ға азайту жөніндегі Дүниежүзілік денсаулық сақтау ұйымының мақсатты көрсеткіштеріне қол жеткізді», – делінген хабарламада.
Министр медициналық көмектің қолжетімділігін арттыру, алғашқы медициналық-санитарлық көмекті жетілдіру, скринингтік бағдарламаларды кеңейту және ана мен бала денсаулығын қорғау қызметін жаңғырту жөніндегі жұмыстар туралы да баяндады. Сонымен қатар онкологиялық қызметті дамыту бағытындағы жұмыстар жалғасып жатқаны айтылды.
«Астанадағы жаңа онкологиялық орталық базасында протондық терапия орталығы ашылды. Қызылорда мен Ақтауда екі жаңа ПЭТ/КТ орталығы пайдалануға берілді. Барлық өңірде сараптамалық эндоскопиялық орталықтар ашылды. Ұлттық ғылыми онкологиялық орталық пен бірқатар өңірлік нысандардың құрылысы аяқталды», – деді Әлназарова.
Баспасөз қызметінің мәліметінше, кездесуде міндетті әлеуметтік медициналық сақтандыру жүйесіндегі қаржылық бақылауды күшейту мәселесіне ерекше назар аударылды. Атап айтқанда, қаражаттың мақсатты пайдаланылуын автоматты түрде бақылау, медициналық қызмет көрсетушілерге қойылатын талаптарды күшейту, сондай-ақ денсаулық сақтау саласының бірыңғай цифрлық инфрақұрылымын қалыптастыру және түрлі ақпараттық жүйелерді E-Densaulyq экожүйесіне біріктіру жұмыстары талқыланды.
Министрдің айтуынша, соңғы екі жылда фармацевтика өнеркәсібіне тартылған инвестициялар көлемі 2,3 есе өсіп, саланың экспорттық көрсеткіші 1,9 есеге артқан.
«Жалпы сомасы 316,3 млрд теңгені құрайтын, 400-ден астам дәрілік зат атауын өндіруге арналған алты инвестициялық келісім жасалды», – делінген хабарламада.
Өз кезегінде президент медициналық қызмет сапасын арттыру, саладағы қаржылық тәртіпті күшейту, кадр даярлау жүйесін жетілдіру, денсаулық сақтауды цифрландыруды жеделдету және отандық фармацевтика өндірісін дамыту бойынша бірқатар тапсырма берді.
