Астана. 22 қаңтар. ИНТЕРФАКС-ҚАЗАҚСТАН – Қазақстанда төрт жаңа фармацевтикалық зауыт салынады. Қазақстан Үкіметі Денсаулық сақтау министрлігі мен «АлтИНФАРМ», «МСП-РОМФАРМ», «Абди Ибрагим Глобал фарм» және «Нобел Алматы фармацевтикалық фабрикасы» компаниялары арасында фармацевтикалық өндірісті жергіліктендіру жөніндегі инвестициялық келісімдер жасасуды мақұлдады. Жаңа өндіріс орындары Алматы қаласында (екі жоба), сондай-ақ Түркістан және Алматы облыстарында орналастырылады. Жобалардың жалпы инвестиция көлемі 173 млрд теңгені құрайды. Бұл жобалар аясында 356 дәрілік затты, соның ішінде әлеуметтік маңызы бар препараттарды шығару жоспарланып отыр. Өндіріс бағыттары қатерлі ісік пен қант диабетін емдеуге арналған препараттарды, иммунобиологиялық, вирусқа қарсы, қан аздыққа қарсы, ауырсынуды басатын, қабынуға қарсы, суық тию мен микробқа қарсы дәрілерді қамтиды.
«АлтИНФАРМ» ЖШС жобасы аясында Алматы қаласындағы «Инновациялық технологиялар паркі» арнайы экономикалық аймағында фармацевтикалық зауыт салынады. Инвестиция көлемі – 58,5 млрд теңге. 54 дәрі-дәрмек өндіріледі, оның 35-і әлеуметтік маңызды санатқа жатады. Өндірістік портфельге иммунобиологиялық препараттар, қатерлі ісік пен қант диабетін емдеуге арналған дәрілер кіреді. Бұл жобаның аясында 60 жұмыс орны ашылады. Стратегиялық серіктестер ретінде Sinopharm, Sinovac және Kangtai Biological Technology компаниялары тартылған.
«Нобел Алматы фармацевтикалық фабрикасы» АҚ жобасы бойынша Алматыда халықаралық GMP стандарттарына сай белсенді фармацевтикалық субстанциялар, дәрілік заттар және биопрепараттар шығаратын фармацевтикалық кешен салынады. Инвестиция көлемі – 39,2 млрд теңге. 53 дәрі өндіріледі, оның 17-сі әлеуметтік маңызға ие. Кемінде 200 жаңа жұмыс орны құрылады. Стратегиялық серіктесі – түркиялық Nobel İlaç.
«Абди Ибрагим Глобал фарм» ЖШС жобасы бойынша Алматы облысында көпбейінді өндірістік желілері бар фармацевтикалық кешен құрылмақ. Инвестиция көлемі – 39 млрд теңге. Бұл кешенде вирусқа қарсы препараттар, ІІ типтегі қант диабетін емдеуге арналған және қан аздыққа қарсы дәрілерді қоса алғанда, 76 түрлі дәрі-дәрмек өндіру жоспарлануда. Жоба шеңберінде 150 жұмыс орны ашылады. Серіктесі – Түркияның Abdi İbrahim компаниясы.
«МСП-РОМФАРМ» ЖШС Түркістан облысындағы TURAN арнайы экономикалық аймағында және Алматы облысындағы өндірістік алаңдарда жоғары технологиялы фармацевтикалық зауыт салуды көздейді. Жобаның жалпы инвестиция көлемі – 36,7 млрд теңге. 101 дәрі-дәрмек, соның ішінде ауырсынуды басатын, қабынуға қарсы, суық тиюге қарсы және микробқа қарсы препараттар шығарылады. Жоба аясында шамамен 265 жұмыс орны ашылады. Серіктестері – World Medicine және Rompharm.
Жалпы алғанда, бұл жобалар аясында 675 жаңа жұмыс орны ашылады. Үкіметтің мәліметінше, бұл зауыттардың құрылысы мен іске қосылуы Қазақстанда дәрі-дәрмек өндірісінің үлесін айтарлықтай арттырып, фармацевтикалық нарықтағы импортқа тәуелділікті азайтуға, дәрі-дәрмекпен қамтамасыз етудің тұрақтылығын нығайтуға және халықты сапалы әрі қолжетімді отандық препараттармен қамтамасыз етуге мүмкіндік береді.
22 қаңтардағы ресми валюта бағамы – 1 АҚШ доллары 506,7 теңгеге тең.
