Астана. 13 қаңтар. ИНТЕРФАКС-ҚАЗАҚСТАН – Қазақстан Президенті Қасым-Жомарт Тоқаев Ержан Қазыxанды АҚШ-пен екіжақты ынтымақтастық мәселелері бойынша келіссөздер жүргізу барысында өзінің өкілі етіп тағайындады, деп хабарлады жұма күні Мемлекет басшысының баспасөз қызметі.
«Мемлекет басшысының өкімімен Қазақстан Республикасының Женева қаласындағы (Швейцария) Біріккен Ұлттар Ұйымының бөлімшесі мен басқа да халықаралық ұйымдар жанындағы тұрақты өкілі Қазыxан Ержан Хозеұлына Америка Құрама Штаттарымен екіжақты ынтымақтастықтың өзекті мәселелері бойынша келіссөздер процесінде Қазақстан Республикасы Президентінің өкілі міндеттері жүктелді», – делінген баспасөз қызметінің хабарламасында.
Соңғы жылдары Қазақстан мен АҚШ арасындағы қатынастар айтарлықтай жанданды. Тек 2025 жылдың өзінде Президент Тоқаев АҚШ-қа екі рет ресми сапармен барып, оның барысында бірқатар ірі инвестициялық келісімдерге қол қойылды.
