Астана. 24 ақпан. ИНТЕРФАКС-ҚАЗАҚСТАН – Қазақстан Үкіметі оңтүстік өңірлерде вегетациялық кезеңнің тұрақты өтуін қамтамасыз ету мақсатында су пайдалану лимиттерін бекітті, деп хабарлады Су ресурстары және ирригация министрі Нұржан Нұржігітов.
«2026 жылғы вегетациялық кезең оңтүстік өңірлерде, әсіресе Арал-Сырдария және Шу-Талас бассейндерінде тәуекелдермен өтуі мүмкін. Қалыптасқан жағдайда су үнемдеу технологияларын барынша кеңінен енгізу, сондай-ақ су көп қажет ететін ауыл шаруашылығы дақылдарының егіс алқаптарын қысқарту қажеттілігі туындап отыр», – деді Нұржігітов сейсенбі күні Үкімет отырысында.
Осыған байланысты, оның айтуынша, Үкіметтің жұмыс тобы Қызылорда облысы үшін су пайдалану лимитін 3,2 км³, Алматы облысы үшін – 2,1 км³, Жетісу облысы үшін – 1,8 км³, Жамбыл облысы үшін – 1,2 км³, Түркістан облысы үшін – 3,8 км³ көлемінде белгілеу туралы шешім қабылдады.
Министрдің мәліметінше, Қырғызстандағы Тоқтоғұл су қоймасындағы су көлемі өткен жылмен салыстырғанда 1,5 км³-ке төмен. Вегетация кезеңінің басында су қоймасын жинақтау режиміне көшіру жоспарланып отыр, бұл Түркістан облысының Мақтаарал және Жетісай аудандарын сумен қамтамасыз етуде мемлекетаралық «Достық» каналы арқылы су жеткізуге кері әсер етуі мүмкін.
«Осыны ескере отырып, облыс әкімдіктеріне су алу лимиттерін қатаң сақтау, оның ішінде күріш егісіне арналған лимиттерді де назарға алу орынды деп санаймыз. Түркістан облысында “Достық” каналы бойында күріш егісін болдырмау, Қызылқұм каналы бойынша – 3,5 мың гектардан аспау, ал Қызылорда облысында – 70 мың гектардан аспау қажет», – деді министр.
Оның деректеріне сәйкес, ағымдағы жылғы 18 ақпандағы жағдай бойынша оңтүстік өңірлердің су қоймаларында 23,4 млрд текше метр су жиналған, бұл өткен жылдың осы кезеңімен салыстырғанда 759 млн текше метрге аз.
