Астана. 19 ақпан. ИНТЕРФАКС-ҚАЗАҚСТАН — Қазақстан Президенті Қасым-Жомарт Тоқаев отандастарын барша мұсылман қауымы үшін қасиетті Рамазан айының басталуымен құттықтады.
Құттықтауында Мемлекет басшысы бұл кезең рухани тазару, адамгершілік тұрғыдан кемелдену, мейірім мен жанашырлық таныту уақыты екенін атап өтті. Ораза адам бойында сабыр мен төзімділікті қалыптастырып, кішіпейілділік, жауапкершілік және адалдық сияқты ізгі қасиеттерді нығайтатынын жеткізді.
«Қазақстан мәні жағынан тарихи трансформация мен жаңғыру кезеңіне қадам басты. Жалпыұлттық референдумға жаңа халықтық Конституция жобасы ұсынылды. Бұл — мемлекетіміздің дамуын прогресс пен әділеттілік жолына бағыттайтын Негізгі заң. Құжат көпғасырлық мемлекеттілігімізді нығайтуды, саяси, азаматтық және экономикалық институттардың тиімділігін арттыруды көздейді, сондай-ақ адам құқықтарын қорғауға бағытталған», — деді Президент.
«Дәстүрлі рухани және мәдени құндылықтарды сақтап, оларды қолдай отырып, біз құқық үстемдігі мен заңдылық, тәртіп пен тазалық, әділеттілік пен отаншылдық сияқты қоғамдық қағидаттарды дұрыс қабылдайтын жаңа ұлттық дүниетанымды қалыптастырып келеміз. Бұл ұстанымдардың барлығы қасиетті Рамазан айының мәңгілік құндылықтарымен үндес. Білімге, тазалыққа және ізгі ниетке негізделген өркениетті қоғамда Рамазан айы жаңа рухани мәнге ие болып, игі ниетті азаматтардың бәріне оң ықпалын тигізеді», — деп атап өтті Тоқаев.
