АСТАНА. 28 қараша. ИНТЕРФАКС-ҚАЗАҚСТАН – Қазақстанда бір палаталы парламент құру мәселесі бойынша өтетін алдағы референдумда азаматтар шын мәнінде жаңа Конституцияға дауыс береді. Бұл туралы Мемлекет басшысы Қасым-Жомарт Тоқаев жұма күні ауыл әкімдерінің форумында мәлім етті.
«Жалпы алғанда, Негізгі заңға енгізілетін өзгерістер мен толықтырулар саны өте көп болуы мүмкін. Сондықтан бұл референдумда халық шын мәнінде жаңа Конституцияға дауыс береді деуге болады», – деді Президент.
Мемлекет басшысы алдағы парламенттік реформа аясында түрлі ұсыныстар түсіп жатқанын атап өтті.
«Барлық осы мәселелер арнайы жұмыс тобының аясында жан-жақты зерттеледі. Сонымен қатар, реформаларға қатысты басқа да көптеген ұсыныстар бар. Олар мұқият пысықталып, кейін жария етіледі. Менің де бұл маңызды мәселеге қатысты бірқатар ұсыныстарым бар», – деді Тоқаев.
Атап айтқанда, ол парламентте жаңа комитеттер құру мүмкіндігін қарастыру қажеттігін айтты.
Бұған дейін хабарланғандай, биыл 8 қыркүйекте Қазақстан халқына арнаған Жолдауында Қасым-Жомарт Тоқаев екі палаталы парламенттің орнына бір палаталы парламент құру мүмкіндігін зерделеуді және бұл мәселені 2027 жылы референдумға шығарып, Конституцияға өзгерістер енгізуді ұсынған болатын.
Қазан айының басында Президент парламенттік реформалар жөніндегі жұмыс тобын құру туралы Жарлыққа қол қойды. Оның құрамына Мәжіліс пен Сенат депутаттары, Қазақстан халқы Ассамблеясының өкілдері, саяси партиялар фракцияларының жетекшілері, ғылыми-зерттеу институттарының ғалым-заңгерлері, сарапшылар мен Ұлттық құрылтай мүшелері енген.
Қазақстанның қазіргі Парламенті 1995 жылдан бері Сенат және Мәжіліс атты екі палатадан тұрады.
