Астана, 1 қыркүйек. ИНТЕРФАКС-ҚАЗАҚСТАН – Қазақстан Президенті Қасым-Жомарт Тоқаев Шанхай ынтымақтастық ұйымы (ШЫҰ) аясында Су мәселелерін зерттеу орталығын Қазақстан аумағында құру туралы бастама көтерді, деп хабарлады Мемлекет басшысының баспасөз қызметі.
«ШЫҰ аясында Су мәселелерін зерттеу орталығын Қазақстанда құруды ұсынамыз», – деді Президент Тоқаев Қытайдың Тяньцзинь қаласында өткен ШЫҰ мүше мемлекеттер басшылары кеңесінің отырысында.
Мемлекет басшысы климаттық сын-қатерлердің шекара танымайтынын және көптеген елдерге зиян келтіріп жатқанын атап өтті.
Сондай-ақ ол құрғақшылық, шөлейттену, су көздерінің тартылуы, мұздықтардың еруі және басқа да экологиялық қауіптермен күресу үшін бірлескен стратегиялар әзірлеудің маңыздылығына тоқталды.
