Астана. 7 қараша. ИНТЕРФАКС-ҚАЗАҚСТАН – Қазақстан Президенті Қасым-Жомарт Тоқаев халықаралық саясаттағы АҚШ Президенті Дональд Трамптың рөлін атап өтіп, оны көрнекті мемлекет қайраткері деп атады.
«Сіздің парасатты әрі батыл саясаттарыңыз әлемде кең қолдауға лайық деп санаймын және мен бұл бағыттағы көзқарастарыңызды бөлісемін», – деді Тоқаев Вашингтонда өткен «Орталық Азия – АҚШ» саммитінде сөйлеген сөзінде. Президенттің сөздері оның баспасөз қызметінің хабарламасында келтірілген.
«Сіздің басшылығыңызбен Америка жаңа «алтын дәуірге» қадам басуда. Мен Сіздің «Американы қайтадан ұлы мемлекетке айналдыру» (Making America Great Again) жөніндегі алыс көздеген стратегияңызды жоғары бағалаймын. Бұл идеология мені «Заң және Тәртіп» қағидасына негізделген Әділетті әрі Күшті Қазақстан құрудың кең ауқымды бағытын жүзеге асыруға жігерлендіреді», – деді Мемлекет басшысы.
Тоқаев сонымен қатар: «Сіз бейбітшілікті қолдаушы Президент ретінде сегіз ай ішінде сегіз соғысты тоқтатуға ықпал еттіңіз. Бұл Америка Құрама Штаттарының халықаралық тұрақтылықтың тірегі ретіндегі рөлін айтарлықтай күшейтті», – деп атап өтті.
