Лондон. 2 қараша. ИНТЕРФАКС – Англияда пойыз жолаушыларына жасалған шабуыл тергеу барысында лаңкестік әрекет ретінде тіркелмеді, деп хабарлайды The Guardian.
«Қазіргі уақытта жүргізіліп жатқан тергеу барысында бұл шабуылдың лаңкестік әрекет екенін дәлелдейтін қандай да бір дерек жоқ», – деді полиция өкілі Джон Лавлесс.
Оның айтуынша, «тергеудің бастапқы кезеңінде оқиғаның себептеріне қатысты тұжырым жасау орынсыз болар еді».
Полиция шабуылдың себептері мен барлық мән-жайын анықтау жұмыстарын жалғастырып жатыр.
Бұған дейін белгісіз екі адамның пойыз жолаушыларына пышақпен шабуыл жасауы салдарынан 10 адам жарақат алып, оның тоғызы ауыр халде екені хабарланған еді. Оқиға сенбі күні кешке Донкастерден Лондонға бағыт алған пойызда болған.
Хантингдон станциясына жеткенде пойыз тоқтатылып, оқиға орнына дереу полиция мен медицина қызметкерлері жеткен.
Полиция екі күдіктіні ұстап, оларды шабуылға қатысы бар деп күдіктеуде.
Ұлыбритания премьер-министрі Кир Стармер бұл оқиғаны «үрейлі әрі үлкен алаңдаушылық туғызатын жағдай» деп атап, жедел көмек көрсеткен төтенше жағдай қызметтеріне алғыс білдірді.
