Вашингтон. 15 қаңтар. ИНТЕРФАКС – АҚШ вице-президенті Джей Ди Вэнс Сенатта шешуші дауыс беру арқылы конгресс мақұлдауынсыз Венесуэлаға қарсы әрекеттерге қарулы күштерді пайдалануға тыйым салуды көздеген резолюцияның қабылдануына жол бермеді, деп хабарлайды америкалық бұқаралық ақпарат құралдары.
The Hill басылымының мәліметінше, Вэнстің шешуші дауысы нәтижесінде 51 «қарсы» және 50 «қолдаймын» деп дауыс берген.
Аталған резолюция қабылданған жағдайда, АҚШ президенті Дональд Трамптың әкімшілігі Венесуэлада әскери күш қолдануды жалғастыру үшін Конгрестен арнайы рұқсат алуға міндетті болар еді.
CNN хабарлауынша, республикалықтар «Трампты Венесуэлаға қатысты әскери өкілеттіктерін шектеуден қорғап қалды».
Желтоқсан айының басында ұсынылған резолюцияға сәйкес, соғыс жариялау немесе әскери күш қолдануға арнайы рұқсат берілген жағдайларды қоспағанда, президент қарулы күштерді пайдалануды тоқтатуы тиіс болатын.
Еске сала кетейік, 3 қаңтарда америкалық әскери күштер Каракаста Венесуэла президенті Николас Мадуроны ұстап, оны АҚШ-қа жеткізген. АҚШ билігі оны есірткі саудасына қатысы бар деп айыптайды.
5 қаңтарда Мадуро Манхэттендегі федералдық сот алдында жауапқа тартылды. Оған есірткі саудасына қатысты айыптар тағылды, алайда ол өз кінәсін мойындаған жоқ.
