«Неге Бейбіт Қазақстанда соғыс жүргізіп жатқан Ресейдегідей бюджет тапшылығы бар?» – деген жүргізушінің сауалына, «Мұндай жағдай болады…», – деп жауап береді «Гиперборея» жобасының тұрақты сарапшысы Рахымбек Әбдірахманов, «… егер сіз санкциялар бойынша әлем чемпионымен көрші болсаңыз».
«… Біз Ресейде болып жатқан үдерістерді қайталап отырғандаймыз… экономика көлемдері салыстыруға келмесе де, формалды түрде егемен ел болсақ та, біз Ресей бастан кешіп отырған дәл сол күйзелістерге тап болудамыз», – дейді қонақ. Ал жүргізуші Вадим Борейко өз кезегінде былай түйіндейді: «Ресейге қатысты, ашық айтқанда, вассалдық жағдайының салдарынан Қазақстан экономикасы Ресей Федерациясының Украинадағы соғысқа жұмсап отырған шығындарының бір бөлігін көтеруге мәжбүр болып отыр».
Евразия24 пікірі:
Мұның бәрі тұрақты жүргізуші Вадим Борейко мен оның тұрақты сарапшысы Рахимбек Әбдірахмановтың кезекті, әдеттегідей ұзақ, жан-жақты әрі мазмұнды әңгімесінің басында айтылды. Бұл жолы Ресейдің «тағдыршешті рөлі» туралы осындай кіріспе, діндар адамның жердегі істерге көшпес бұрын Жаратқанға міндетті түрде жалбарынатындай, әңгімені бастайтын дәстүрлі үндеу іспетті болды.
Ресейге қатысты «вассалдық» жағдай туралы, «формалды түрде егемен» экономика жайындағы бұл кіріспе де өзіндік бір рәсім іспетті естілді. Одан кейін әңгіме Ресейден алыстап, Қазақстанның өз экономикалық және әлеуметтік ахуалына ойысты. Мемлекет басшысы мен Үкімет «тұрақты әрі қолайлы» деп сипаттайтын осы қазақстандық шындықты тұрақты қонақ-сарапшы бұл жолы да кәсіби тұрғыда күмәнға алды. Тіпті Үкімет жүргізіп отырған саясатты жан-жақты сынға алып, оның әлсіз тұстарын ашып көрсетті. Бұл талқылауда жүргізуші де әдеттегідей сұрақтарды дәл әрі орынды қоя отырып белсенді рөл атқарды.
Өздеріңіз де тыңдап көріңіздер. Рахымбек Әбдірахманов экономиканы терең түсінетін, сандық деректерді жақсы меңгерген және ойды нанымды жеткізе білетін маман.
Бұдан бөлек, Ресейге қатысты осындай «дәстүрлі» кіріспенің өзі Қазақстандағы қоғамдық ахуалдың бір қыры болып отыр. Иә, «кім кімге вассал» деген секілді өткір тіркестерді шетке ысырып қойсақ, жағдай дәл осындай: Қазақстан мен Ресей экономикалық, географиялық әрі тарихи тұрғыдан бір-бірімен тығыз әрі ажырамас түрде байланысты.
Сондықтан кәсіби тұрғыда батысшыл бағытты ұстанатын журналист Борейко мен либералды көзқарастағы экономист Әбдірахмановтан өздері «тағдыршешті тәуелділік» деп бағалайтын осы байланыстан шығудың қандай жолын ұсынатынын сұрау орынды болар еді. ЕО мен НАТО-ға үміт артқан Украина сияқты Ресеймен қақтығысу керек пе, әлде Еуразия кеңістігін бірлесе дамытуды таңдау ма?
