Қазақстан Республикасы Сауда және интеграция министрлігі хабарлайды: «ЕАЭО шеңберінде медициналық бұйымдарды ұлттық ережелер бойынша тіркеу мерзімі 2027 жылдың соңына дейін ұзартылды. Бұған дейін бұл мүмкіндік 2025 жылдың 31 желтоқсанына дейін шектелген болатын, ал 2026 жылдың 1 қаңтарынан бастап медициналық бұйымдарды тек ЕАЭО қағидалары бойынша тіркеуге толық көшу жоспарланған еді. ЕАЭО аясында медициналық бұйымдардың айналымының бірыңғай қағидаттары мен ережелері туралы келісімге өзгерістер енгізу жөніндегі тиісті Хаттама 2025 жылы 29 желтоқсанда қол қойылды. Қабылданған түзетулерге сәйкес, 2027 жылдың 31 желтоқсанына дейін өндірушілер мен жеткізушілер медициналық бұйымдарды ЕАЭО талаптары бойынша да, сондай-ақ мүше мемлекеттердің ұлттық заңнамасына сәйкес те тіркей алады. Бұл, әсіресе, ЕАЭО-ның ортақ нарығының талаптарына қатар бейімделіп жатқан отандық өндірушілер мен импорттаушылар үшін маңызды. Қазақстандық бизнес үшін өтпелі кезеңнің ұзартылуы медициналық бұйымдарды нарыққа шығару кезінде икемділіктің сақталуын, реттеушілік тәуекелдердің төмендеуін және тіркеу қағидаларының өзгеруіне байланысты үзілістерсіз жеткізілімдерді жоспарлау мүмкіндігін білдіреді. Сондай-ақ бұл медициналық бұйымдарды ЕАЭО қағидалары бойынша тіркеуге кезең-кезеңімен көшуге жағдай жасайды».
Евразия24 пікірі:
Өндірушілер, жеткізушілер және тұтынушылар үшін бұл – жағымды жаңалық. Себебі бірқатар медициналық бұйымдар белгіленген мерзімде тіркеуден өте алмай, нарықта, әсіресе жедел медициналық қызмет пен ауруханалар сияқты бюджеттік ұйымдарда, тапшылық туындау қаупі болған еді. Қазақстандық өндірушілер енді техникалық құжаттаманы жетілдіруге және жеткізушілердің ЕАЭО талаптарына сай неғұрлым күрделі әрі ұзақ тіркеу рәсіміне дайындалуына мүмкіндік беретін өзге де ұйымдастырушылық шараларды жүзеге асыруға уақыт алды. Бұл, өз кезегінде, жеткізу тізбегінің үзілуі мен тұтынушыларға арналған тауарлар түр-тізімінің қысқару тәуекелдерін төмендетеді. Медициналық мақсаттағы өнімдерді тек «еуразиялық» тіркеу тәртібіне көшу бойынша бастапқыда белгіленген мерзімдерден ЕАЭО-ның шегінуін қисынды әрі прагматикалық шешім деп бағалауға болады.
