EconomyKZ хабарлайды: «Ұлттық статистика бюросының жедел деректеріне сәйкес, 2025 жылы негізгі капиталға салынған инвестициялар (НКИ) 13%-ға өсіп, 22,7 трлн теңгеге жетті. Желтоқсан айында қарашаға қарағанда НКИ көлемі бірден 1,7 есеге артқан. Бірқатар өңірлерде айлық өсім ерекше жоғары болды: Жамбыл облысында – 3,6 есе, Қостанай облысында – 3,5 есе, Қарағанды және Жетісу облыстарында – 2,9 есе, Ақтөбе облысында – 2,7 есе. Жыл соңындағы мұндай айқын өсім, ең алдымен, жылдық көрсеткіштерді әкімшілік тәсілдер арқылы «жеткізуге» деген талпыныспен байланысты болуы мүмкін, өйткені негізгі капиталға салынатын инвестициялар өңірлік билік органдары жұмысының тиімділігін бағалаудағы негізгі көрсеткіштердің бірі болып қала береді.
2025 жылы негізгі капиталға инвестициялар өсімінің негізгі қозғаушы күші шағын кәсіпорындар болды. Жыл қорытындысы бойынша олардың НКИ көлемі 13,21 трлн теңгеге жетіп, 19,5%-ға артты. Ал ірі компанияларда бұл көрсеткіш 7,07 трлн теңгені құрап, өсім небәрі 3,2% деңгейінде болды. Бұл инвестициялық белсенділіктің негізгі өсімі дәл шағын бизнес сегментінде және соған байланысты жобалар есебінен қалыптасқанын көрсетеді».
Евразия24 пікірі:
Біз Қазақстанға әбден үйреншікті құбылысқа – қаржы жылының соңында байқалатын «есептік серпіліске» тағы да куә болдық. Әдетте кез келген жылдың соңғы тоқсанында бюджет қаражатын игеру ең жоғары қарқын алады.Айта кету керек, мемлекеттік тапсырыстар аясындағы бюджетті игеру тәжірибесінде мұндай құбылыс әлдеқашан қалыпты жағдайға айналды. Бұл, әдетте, жылдың алғашқы жартысында конкурстық рәсімдер жүргізіліп, нақты қаржыландыру тек жыл ортасынан кейін басталуымен байланысты. Жеке сектордағы жағдайға келсек желтоқсан айында инвестиция көлемінің бірден 1,7 есеге өсуі ірі, ұзақмерзімді жобалармен немесе өндірістің соған сай ұлғаюымен дәлелденіп отырған жоқ. Мұнда басты рөлді шағын бизнес көрсеткіштері атқарып отыр. Өз табиғатына сай шағын кәсіпорындар ауқымды, капитал сыйымдылығы жоғары өндірістік тізбектер құрмайды. Олардың инвестициялары көлемді болып көрінгенімен, көбіне қысқа мерзімге бағытталып, жекелеген, бір реттік жобаларды жабумен шектеледі. Нәтижесінде Қазақстанда есепке бағдарланған классикалық KPI-экономиканың бейнесі айқын көрінеді: нақты экономикалық мазмұннан гөрі, формалды есеп пен көрсеткіштер алдыңғы орынға шығып отыр.
