Астана. 28 қаңтар. ИНТЕРФАКС-ҚАЗАҚСТАН – Қазақстан Президенті Қасым-Жомарт Тоқаев құқық қорғау органдарын кәсіпкерлермен өзара іс-қимыл тәсілдерін қайта қарауға, бизнестің дамуына кедергі келтіретін тосқауылдарды жоюға шақырды.
«Бизнестің дамуына кедергі келтіретін бөгеттерді жою маңызды. Бұл бағытта жүйелі жұмыс көптеген жылдар бойы жүргізіліп келеді. Алайда Атамекен ұлттық кәсіпкерлер палатасы мен жекелеген кәсіпкерлерден шағымдар әлі де түсіп жатыр. Барлық құқық қорғау органдары бизнеске заңсыз кедергі жасау мемлекеттік мүдделерге қарсы ауыр қылмысқа пара-пар екенін түсінуі тиіс. Бұл, ең алдымен, Қаржылық мониторинг агенттігіне қатысты», – деді Тоқаев сәрсенбі күні Қаржылық мониторинг агенттігінде өткен кеңесте.
Сонымен қатар Президент өңірлерде «жеке пайда табу мақсатында заңды бизнесті бұғаттау тәжірибесі әлі де кездесетіні» туралы өзіне сигналдар түсіп жатқанын атап өтті.
«Ескертемін: мұндай деректер расталған жағдайда заңға сәйкес ең қатаң ықпал ету және жауапкершілікке тарту шаралары қабылданады», – деді мемлекет басшысы.
Оның айтуынша, өткен жылдың қорытындысы бойынша Қаржылық мониторинг агенттігі тергеген қылмыстық істердің шамамен 40%-ы, яғни мыңнан астам іс ақтау негіздері бойынша тоқтатылған.
«2025 жылы өндірісте 2710 іс болды, оның 1061-і ақтау негіздерімен тоқтатылды. Бұл жай ғана көрсеткіш емес. Мұндай әрекеттердің салдарынан кәсіпкерлер шығынға ұшырайды, іскерлік беделі зардап шегеді, еңбек ұжымдарында әлеуметтік шиеленіс артады. Мұның барлығы бизнестің дамуын тежеп, елдегі инвестициялық ахуалға кері әсерін тигізеді», – деді Президент.
Осыған байланысты Қасым-Жомарт Тоқаев кәсіпкерлермен өзара іс-қимыл тәсілдерін қайта қараудың маңыздылығын атап өтті.
«Мұнда ақылға қонымды тепе-теңдікті сақтау, “алтын ортаны” табу қажет. Егер кәсіпкер қаржылық заңбұзушылық жасаса, оның шаруашылық қызметін бірден тоқтатуға болмайды. Шектеу шаралары тек ерекше жағдайларда, құқықбұзушылыққа сай деңгейде қолданылуы тиіс. Сонымен бірге кәсіпкерлер де заң талаптарын қатаң сақтауға, салықтан жалтармауға, әсіресе мемлекеттің қолдауы мен қорғауын теріс пайдаланып, алаяқтық схемаларға араласпауға міндетті. Алаяқтық біз үшін мүлде жол берілмейтін құбылыс», – деді мемлекет басшысы.
