Астана. 16 ақпан. ИНТЕРФАКС-ҚАЗАҚСТАН — Қазақстан президенті Қасым-Жомарт Тоқаев ел тарихи өзгерістер қарсаңында тұрғанын мәлімдеп, 15 наурызда өтетін референдумда азаматтар жаңа Конституцияға қатысты өз таңдауын жасайтынын еске салды.
«Бұл ел тағдырына тікелей ықпал ететін аса маңызды шешім болады», — деді Тоқаев дүйсенбі күні Астанада UAE SWAT Challenge-2026 халықаралық турнирінің жеңімпаздарымен кездесуде.
Мемлекет басшысы атап өткендей, Негізгі заң жобасында еліміздің егемендігі мен мемлекеттілігін нығайтатын берік рухани және құқықтық құндылықтар бекітілген.
«Қазақстан Республикасының аумақтық тұтастығы, егемендігі, тәуелсіздігі, сондай-ақ адам, оның өмірі, құқықтары мен бостандықтары ең жоғары құндылықтар ретінде айқындалған. Жауапты әрі жасампаз патриотизм ұғымы бекітілді», — деді президент.
Оның айтуынша, жаңа Негізгі заң елдің ұзақ мерзімді өркендеуіне жол ашуы тиіс.
