Астана. 10 наурыз. ИНТЕРФАКС-ҚАЗАҚСТАН – Ирандағы әскери қақтығыс басталғалы бері Таяу Шығыс елдерінен 8,5 мыңнан астам Қазақстан азаматы эвакуацияланды. Бұл туралы сейсенбі күні республиканың Сыртқы істер министрлігінің баспасөз қызметі хабарлады.
«Эвакуация басталғалы бері Таяу Шығыс елдерінен 8 мың 585 қазақстандық елге қайтарылды. Қазақстан Республикасының Сыртқы істер министрлігі құзыретті органдармен бірлесіп Таяу Шығыстағы қақтығыс аймағынан азаматтарымызды елге қайтару жұмыстарын жалғастырып жатыр», – делінген хабарламада.
Министрлік мәліметінше, өңірдегі Қазақстанның дипломатиялық өкілдіктері жергілікті жердегі іс-қимылды үйлестіріп, отандастармен тұрақты байланыс орнатып отыр.
Бұған дейін Сыртқы істер министрлігі Таяу Шығыстан елге 7,3 мыңнан астам қазақстандықтың қайтарылғанын хабарлаған еді.
