Рим, 25 наурыз. ИНТЕРФАКС – АҚШ пен Иран өкілдерінің келіссөздері алдағы демалыс күндері Пәкістанда өтуі мүмкін. Бұл туралы сәрсенбі күні МАГАТЭ бас директоры Рафаэль Гросси мәлімдеді.
«Менің ойымша, осы демалыс күндері Исламабадта келіссөздер өтуі мүмкін», – деді Гросси «Коррьере делла сера» газетіне берген сұхбатында.
Оның айтуынша, бұл жолы талқыланатын мәселелер ауқымы бұрынғыдан кеңірек болады және тек ядролық тақырыппен шектелмейді.
«Бұл жолы әңгіме тек ядролық мәселелер туралы ғана емес, зымыран бағдарламасы, Иран қолдайтын топтар және Иранға қауіпсіздік кепілдіктері туралы да болады», – деп атап өтті ол.
Бұған дейін Axios басылымы дереккөздерге сілтеме жасап, АҚШ Иранмен бейсенбі күні келіссөздер ұйымдастыруды жоспарлап отырғанын, алайда Тегеран бұл ұсынысқа әлі жауап бермегенін хабарлаған. Ақпаратқа сәйкес, Вашингтон Иранға әскери іс-қимылды тоқтату жөніндегі 15 тармақтан тұратын ұсыныс жолдағанымен, әзірге жауап алмаған.
Сонымен қатар, басқа дереккөздердің мәліметінше, Иранның ресми тұлғалары АҚШ-пен келіссөздерге делдал болуға тырысып отырған елдерге Дональд Трамптың қақтығысты бейбіт жолмен реттеуге деген ниетіне сенбейтіндерін жеткізген.
Бұған дейін Пәкістан премьер-министрі Шахбаз Шариф оның елі Таяу Шығыстағы дағдарысты реттеу мақсатында АҚШ пен Иран арасындағы келіссөздерге алаң болуға дайын екенін растаған. The Guardian басылымы дереккөздерге сілтеме жасап, Пәкістандағы келіссөздерде АҚШ делегациясын вице-президент Джей Ди Вэнс басқаруы мүмкін екенін жазған.
