Астана, 26 наурыз. ИНТЕРФАКС-ҚАЗАҚСТАН – Қазақстан Парламентінің Сенаты бейсенбі күні өткен пленарлық отырыста «1993 жылғы 22 қаңтардағы азаматтық, отбасылық және қылмыстық істер бойынша құқықтық көмек және құқықтық қатынастар туралы конвенцияға өзгерістер енгізу туралы хаттаманы ратификациялау туралы» заңды мақұлдады.
Бұған дейін заңды Мәжіліс қабылдаған. Осылайша, құжат Парламент тарапынан толық қабылданып, Президенттің қол қоюына жолданды.
Сенаттың Конституциялық заңнама, сот жүйесі және құқық қорғау органдары жөніндегі комитетінің қорытындысында атап өтілгендей, құжат Минск конвенциясына қатысушы мемлекеттердің аумағында кәмелетке толмаған балалардың құқықтары мен мүдделерін қорғауды қамтамасыз етеді. Атап айтқанда, алимент өндіру туралы сот бұйрықтары басқа мемлекеттердің аумағында танылуға және мәжбүрлі орындалуға жататын сот актілерінің тізбесіне енгізіледі.
2020–2025 жылдар аралығында Қазақстанда халықаралық және шетелдік соттар мен арбитраждардың шешімдері негізінде балалардың пайдасына 106 атқарушылық парақ берілген. Осы өндірістер бойынша берешек сомасы шамамен 47 млн теңгені құраған.
Қорытындыда хаттаманы ратификациялау трансшекаралық жағдайларда алимент өндіріп алу тиімділігін арттырып, балалардың құқықтарын қорғауды күшейтетіні және еліміздің осы саладағы халықаралық беделін нығайтатыны айтылған.
Сенаторлар сондай-ақ 2002 жылғы 7 қазандағы азаматтық, отбасылық және қылмыстық істер бойынша құқықтық көмек және құқықтық қатынастар туралы конвенцияға өзгерістер енгізу туралы хаттаманы ратификациялау жөніндегі заңды да мақұлдады.
Бұл құжат кәмелетке толмаған балалардың құқықтары мен заңды мүдделерін қорғауға бағытталған. Түзетулерге сәйкес, алимент өндіру туралы сот бұйрықтары Кишинёв конвенциясына қатысушы мемлекеттердің аумағында танылып, орындалатын болады.
1993 жылғы Минск конвенциясы – ТМД елдері арасындағы азаматтық, отбасылық және қылмыстық істер бойынша құқықтық көмек көрсетуді реттейтін негізгі халықаралық келісім.
Ал Кишинёв конвенциясы – ТМД мемлекеттері арасында құқықтық көмек пен құқықтық қатынастарды реттейтін, 1993 жылғы Минск конвенциясының қағидаттарын дамытатын және қатысушы елдер аумағында сот шешімдерін өзара тануды қамтамасыз ететін халықаралық құжат.
