Астана, 26 наурыз. ИНТЕРФАКС-ҚАЗАҚСТАН – Қазақстан Президенті Қасым-Жомарт Тоқаев бейсенбі күні XIV қысқы Паралимпиада ойындарының чемпионы Ербол Хамитов пен оның жаттықтырушыларын марапаттады, деп хабарлады Ақорда баспасөз қызметі.
Марапаттау рәсімі барысында Президент өткен жылы елде төрт заманауи инклюзивті спорт кешені іске қосылғанын атап өтті.
«Алдағы кезеңде мұндай орталықтар барлық өңірде көбейе түседі. Бұл маңызды іске демеушілер де белсенді қатысуы тиіс деп санаймын. Жалпы, мемлекет паралимпиадалық қозғалысты қолдауға ерекше көңіл бөліп отыр, бұл бағыттағы қаржыландыру көлемі артты», – деп келтіреді баспасөз қызметі Мемлекет басшысының сөзін.
Президент сондай-ақ параспортшылардың табандылығы мен қайсарлығы көпшілікке үлгі екенін, олардың жетістіктері жас ұрпаққа өнеге болатынын атап өтті.
Қазақстандық паралимпиадашы Ербол Хамитов Италияда өткен Паралимпиада ойындарында пара биатлоннан алтын медаль, ал пара шаңғы жарысынан қола жүлде жеңіп алған.
