KazTAG хабарлауынша, Қазақстандағы Kinopark кинотеатрлар желісі кинематографистерден фильмдерді прокатқа шығару үшін жарнама шығындарын міндетті түрде төлеуді заңсыз талап еткен. Бұл туралы Бәсекелестікті қорғау және дамыту агенттігінің баспасөз қызметі мәлімдеді «Алматы қаласы бойынша агенттік департаменті Kinopark – Kinoplexx Theatres кинотеатрлар желісінің әрекеттерінен үстем жағдайды теріс пайдалану белгілерін анықтады. Аталған желі отандық кинопродюсерлерге жарнамалық бюджет төлеуді міндеттеген, ал бұл талап орындалмаған жағдайда фильмдер прокатқа жіберілмеген. Мұндай талаптар бәсекелестікті шектеп, нарық субъектілерінің заңды құқықтарын бұзған, киноөндірушілердің прокат нарығына қол жеткізуіне кедергі келтіріп, отандық киноиндустрияның дамуын тежеген», – делінген хабарламада. Kinopark – Kinoplexx Theatres компаниясының атына бәсекелестікті қорғау саласындағы заңнаманы бұзу белгілері туралы хабарлама жолданған. «Хабарламаны қарау нәтижесінде анықталған заңбұзушылықтар жойылды. Атап айтқанда, жарнамалық шығындарды мәжбүрлі түрде жүктеу тәжірибесі тоқтатылып, фильмдерді прокатқа шығару үшін талап етілетін «кіру жарнасы» жойылды», – деп көрсетілген агенттік мәліметінде.
Еуразия24 пікірі:
Өкінішке орай, тек кинотеатрлар ғана емес, супермаркеттер де отандық тауарлар мен қызмет өндірушілері үшін әлдеқашан «ақылы кіру тетігіне» айналған. Бұған мысал ретінде 2024 жылы Маңғыстау облысында бөдене жұмыртқасын өндіруші кәсіпкердің өз өнімін жергілікті супермаркеттер желісінде сатуға шығару құқығын тек сот арқылы алған жағдайды келтіруге болады. Ірі сауда желілерінің сөрелеріне тауар қою мәселесінің күрделілігін мойындай отырып, 2025 жылдың тамыз айында Үкімет ішкі нарықты қорғауды күшейту және жергілікті өндірушілерді қолдау туралы шешім қабылдады. Бұған сәйкес, сауда сөрелерінің 50 пайызы қазақстандық өнімдерге арналуы тиіс. 26 қыркүйектен бастап ішкі сауда ережелеріне отандық өнімдер үшін міндетті түрде сауда орнын бөлуді көздейтін өзгерістер күшіне енді. Кинотеатрларға қатысты айтар болсақ, киноиндустрия өкілдері ақылы «кіру» мәселесін Бәсекелестікті қорғау және дамыту агенттігінің ресми мәлімдемесіне дейін-ақ бірнеше рет көтерген болатын. Алайда бұл мәселені шешуде мемлекеттік органның араласуы шешуші рөл атқарды.
Қазақстандық кино саласы көрерменге жету жолында қосымша шығындарды көтеретін жағдайда емес. Нарықта қаржылық мүмкіндігі жоғары жобалар емес, сапалы фильмдер бәсекеге қабілетті болуы тиіс.
