Шымкент, 27 наурыз. ИНТЕРФАКС-ҚАЗАҚСТАН – Еуразиялық экономикалық одаққа мүше елдер заманауи технологияларға бейімделуі тиіс, оның ішінде кедендік әкімшілендіру, логистика, өнеркәсіп және агроөнеркәсіп кешенінде жасанды интеллектті қолдану маңызды. Бұл туралы Қазақстан Премьер-министрі Олжас Бектенов мәлімдеді.
Оның айтуынша, Қазақстан цифрлық реттеу мен экономиканы трансформациялау бағытында одақтағы әріптестермен білім мен тәжірибе алмасуға дайын.
«Осы тұрғыда биыл мамыр айында Астанада жоспарланып отырған ЕАЭО аясында жасанды интеллектті жауапты дамыту туралы бірлескен мәлімдемеге қол қою практикалық өзара іс-қимыл мен технологияларды енгізудің негізін қалайды», – деді Бектенов Еуразиялық үкіметаралық кеңестің отырысында.
Премьер-министр сондай-ақ күрделі геосаяси жағдайға қарамастан, бірлестік тұрақты экономикалық өсімді қамтамасыз ету, ортақ нарықты дамыту және өнеркәсіптік кооперацияны тереңдету бағытындағы жұмысты жалғастырып отырғанын атап өтті.
Ол 2026 жылғы 1 қаңтардан бастап Қазақстан ЕАЭО органдарына төрағалық ететінін еске салып, негізгі басымдықтардың бірі ретінде экономиканың түрлі салаларында жасанды интеллект технологияларын енгізу болатынын айтты.
