Вашингтон, 29 наурыз. ИНТЕРФАКС – АҚШ пен Израиль Иранға қарсы жүргізілген алғашқы төрт апта ішінде елдегі зымыран өндірісіне қатысты төрт негізгі нысанға және 29 зымыран базасына соққы жасаған. Бұл туралы The Washington Post спутниктік деректерге сілтеме жасап хабарлады.
Басылымның мәліметінше, спутниктер аталған нысандарда елеулі қирауларды, сондай-ақ зымырандар сақталатын жерасты қоймаларына апаратын туннельдердің бүлінгенін тіркеген.
Соққыға ұшыраған негізгі өндіріс орындары Ходжир, Парчин, Каэмие және Шахруд аймақтарында орналасқан. Атап айтқанда, Тегеранның шығысындағы Ходжирде баллистикалық зымырандарға арналған сұйық және қатты отын өндіретін цехтар нысанаға алынып, кемінде 88 ғимарат зақымданған немесе жойылған.
Парчиндегі қатты отын өндіретін кешенде 12 нысан бүлінсе, астана маңындағы Каэмие ауданында ұшыру қондырғылары мен сұйық отын өндірілетін 19 нысан зақымданған. Ал Иранның солтүстік-шығысындағы Шахруд кешенінде кемінде 28 ғимарат қираған немесе жарамсыз күйге түскен.
Зымыран базаларының ішінде Хормозган провинциясындағы «Хоргу» базасында кемінде 15 нысан жойылып, жерасты құрылымдарына кіретін екі өткелге соққы тиген. Лорестан провинциясындағы «Имам Әли» базасында тоғыз жерүсті нысан мен екі жерасты өткелі зақымданған.
Сонымен қатар сарапшылар Ирандағы зымыран базалары мен мобильді ұшыру қондырғыларының нақты саны белгісіз екенін атап өтеді. Бұған қоса, Иранның бұрынғы соққылардан кейін инфрақұрылымды қалпына келтіру тәжірибесін және сырттан қажетті компоненттерді жеткізу мүмкіндігін ескерсек, елдің зымыран бағдарламасын толық жою қиын екені айтылуда.
