Астана. 10 сәуір. ИНТЕРФАКС-ҚАЗАҚСТАН – Қазақстан Президенті Қасым-Жомарт Тоқаев жол-көлік оқиғалары санының артуы мен дәрігерлер және полиция қызметкерлеріне жасалған шабуылдар мемлекет пен қоғам тарапынан қатаң әрекет етуді қажет ететінін мәлімдеді.
«Өкінішке қарай, Қазақстанда жыл сайын жол-көлік оқиғалары салдарынан мыңдаған адам қаза табады, көбінесе бұл жол қозғалысы ережелерін өрескел бұзудың салдары. Бұл – жол беруге болмайтын жағдай», – деді Тоқаев жұма күні Астанада өткен ғалымдарды марапаттау рәсімінде.
Ол барлық өңірлерде жол инфрақұрылымы кең көлемде жаңғыртылып жатқанына қарамастан, жолдағы қайғылы оқиғалар азаймай отырғанын атап өтті.
«Қазіргі жағдай Үкімет пен бүкіл қоғамның ерекше назарын талап етеді. Жоғары жүргізу мәдениетін қалыптастыру, азаматтардың барлық белгіленген ережелерді бұлжытпай сақтауын қамтамасыз ету қажет», – деді Тоқаев.
Сонымен қатар, ол полиция қызметкерлеріне құрметсіздік көрсету және оларға шабуыл жасау фактілерінің жол берілмейтінін айтты.
«Мұндай жағдайлар заң аясында қатаң түрде тоқтатылуы тиіс. Сондай-ақ құқықтық нигилизм дертіне шалдыққан, яғни бұзақылар мен қылмыскерлерді дәріптеуге бағытталған кез келген әрекеттерге тосқауыл қою қажет. Егер біз дамыған ұлт болғымыз келсе, полицейлердің, дәрігерлердің, мұғалімдердің, қызмет көрсету саласы қызметкерлерінің және барлық адал, заңға бағынатын азаматтардың ар-намысы мен қадір-қасиетіне қол сұғушылыққа берік тосқауыл қоюымыз керек», – деп қорытындылады Президент.
