Ақорда хабарлайды: «Президент Қасым-Жомарт Тоқаев Еуразиялық даму банкінің басқарма төрағасы Николай Подгузовты қабылдады. Кездесу барысында Еуразиялық даму банкінің жиырма жылдық жұмысының қорытындылары мен инвестициялық ынтымақтастықты одан ары кеңейту перспективалары талқыланды. Николай Подгузов Мемлекет басшысына ЕАДБ-ның болжамдарын таныстырды, оған сәйкес Қазақстанның ЖІӨ өсімі 2026 жылы кемінде 5,5%-ды құрайды. Бұған үздіксіз инвестициялық белсенділік, ауқымды инфрақұрылымдық бағдарламалар, тұрақты ішкі сұраныс және нық әлеуметтік көрсеткіштер ықпал етеді. Президентке ЕАДБ-ның 2022-2026 жылдарға арналған стратегиясын іске асыру кезеңінде инвестициялардың жалпы көлемі 9,2 млрд долларға жеткені туралы баяндалды. Қазақстан экономикасына 5,2 млрд доллар инвестицияланды – бұл банктің бұған дейінгі 15 жылдағы инвестиция көлемімен тең. Қаржының шамамен 2,1 млрд доллары өнеркәсіпті дамытуға, 1 млрд доллары – энергетикаға, 1 млрд доллары – көлік инфрақұрылымына, 1,1 млрд доллары қаржы секторына бағытталған. Цифрландыруды қолдауға және жасанды интеллект технологияларын енгізуге ерекше назар аударылуда».
Еуразия24 пікірі:
ЕАДБ-ның Қазақстан экономикасына ықпал ету көрсеткіштері шынымен де таңғалдырады. Соңғы жылдары ел экономикасына салынған 5,2 млрд доллар инвестиция банктің бұған дейінгі он бес жылда салған қаржы көлемімен тең. Бұл ЕАДБ-ның еліміздегі жұмыс іс-қимылының қарқыны мен ауқымын күрт арттырғанын және оны әрі қарай жалғастырып жатқанын көрсетеді. ЕАДБ инвестицияларының сапасы бұл аймақтық даму институтының Қазақстан экономикасының берік іргетасын қалауға белсенді атсалысып отырғанын дәлелдейді. Банк экономиканың ең өзекті және ұзақ мерзімді әрі төмен пайызды қаржыны қажет ететін салаларын – өнеркәсіп, энергетика, көлік және қаржы секторларын қамтып отыр. Қолдау үшін таңдалған бұл сегменттердің өзара тығыз байланысты екеніне назар аудару қажет: мәселен, жолдарға салынған инвестиция логистиканы дамытса, энергия жүйесіне құйылған қаржы өнеркәсіптің өсуіне тікелей әсер етеді. Ал ЕАДБ жобаларында цифрландыру мен жасанды интеллект сияқты жаңа бағыттардың пайда болуы – бұл келесі кезеңнің экономикасына жасалған қадам. 20 жылдық тарихы бар даму банкі тек «жолдар мен құбырлар» деңгейінде қалып қоймай, басқару мен технологияның мәнін терең түсінеді. Қарқынды индустрияландыру бағытын алған Қазақстан үшін мұндай серіктестің стратегиялық маңызы зор, бұны Президент пен Банк басшысының кездесуі тағы да айқындап берді.
