Асхат Аймагамбетов мәлімдеді: «Көшеде самса немесе шаурма сату үшін санитарлық кітапша қажет. Тіпті шаштараздарға да тиісті құжат талап етіледі. Ал адамның психикасымен, оның өміріндегі ең осал кезеңде жұмыс істеу үшін ешқандай талап қойылмайды. Ажырасу. Күйзеліс. Балалар. Мұндай жағдайда адам қолдау іздеп, Instagram желісінен психолог табады. Әдемі парақша, қандай да бір онлайн мектептің сертификаты, мыңдаған оқырман. Қызметке ақы төлейді. Айлар бойы қабылдауға барады. Бірақ жағдайы жақсарудың орнына нашарлайды. Шағымданатын нақты мекеме жоқ. Осындай жағдайларды біз жұмыс тобының әр отырысында естіп жүрдік. Жүздеген мың қазақстандық көмекке мұқтаж, бірақ реттелмеген нарыққа тап болып отыр. Кеше Мәжіліс психологиялық көмек көрсету саласын алғаш рет реттеуге бағытталған заң жобасын бірінші оқылымда қабылдады. Қандай өзгерістер енгізіледі: психологтардың тізілімі құрылады — кез келген азамат маманды тексере алады; білім беру талаптары белгіленеді; жауапкершілік күшейтіледі; психолог пен психиатр-дәрігер қызметінің ара-жігі нақты ажыратылады; кепілдендірілген нәтиже уәде етуге тыйым салынады; кәсіби құпияны сақтау міндеті енгізіледі және басқа да нормалар қарастырылған. Қоғамда бұл тақырыпқа қатысты тосқауылдар біртіндеп жойылып келеді, адамдар көмек сұрауға дайын. Біздің міндет — сенім артуға болатын жүйе қалыптастыру. Заң жобасы бірінші оқылымда қабылданды. Екінші оқылымға дейін бірқатар маңызды мәселелер бойынша жұмыс жүргізіп, кейін құжатты қайта қарауға шығару жоспарланып отыр».
Еуразия24 пікірі:
«Ештен кеш жақсы» демекші, Асхат Аймағамбетов айтқан мәселе – Қазақстанның соңғы жылдардағы ащы шындығы. Психологиялық көмек нарығы іс жүзінде ешқандай ережесіз, лицензиясыз және жауапкершіліксіз, өз бетінше дамып келді. Сонымен қатар бұл қызметке деген сұраныс та артты. Айтпақшы, жақында ғана Еуразия24 бұл тақырыпты егжей-тегжейлі талдаған болатын. Денсаулық сақтау министрлігінің мәліметінше, психикалық және мінез-құлық бұзылыстары ресми тіркелген адамдардың саны тұрақты түрде өсіп келеді. Қазақстан дәстүрлі түрде суицид деңгейі жоғары елдердің қатарында қалып отыр, бұл әсіресе жастар арасында өзекті. Міне, осындай жағдайда «балама нарық» гүлденді: коучтар, энергопрактиктер, онлайн-мектептердің сертификатын алған псевдопсихологтар қаптады. Халықтың жағдайы қиындаған сайын, ұсынылатын «қызметтердің» түрі де көбейе түсті. Бұл кездейсоқтық емес, заңдылық. Алайда адам психикасы дилетанттардың эксперимент жасауына рұқсат етілген сала емес. Сондықтан психологтар қызметін реттеуге бағытталған бұл қадам кеш болса да, өте дұрыс. Бұл шара ешқандай оң нәтиже берместен, қиындыққа тап болған жандарды сүліктей сорып отырған инфосығандардың тасқынын тоқтатуы тиіс.
