Астана. 13 сәуір. ИНТЕРФАКС-ҚАЗАҚСТАН – Қазақстанның Премьер-министрі Олжас Бектенов транзиттік-көлік саласын дамыту жөніндегі президент тапсырмаларының орындалу барысына арналған кеңес өткізді, деп хабарлады Үкіметтің баспасөз қызметі.
Хабарламада айтылғандай, Премьер-министр шекарадағы өткізу пункттерін жаңғырту жұмыстарының баяу жүргізіліп жатқанын сынға алып, тиісті қарқынның жоқ екенін атап өтті. Осыған байланысты барлық операциялық үдерістерді жеделдету тапсырылды.
Сонымен қатар, Үкімет басшысы Бақты – Аягөз теміржол желісінің құрылысына ресурстардың жеткілікті деңгейде жұмылдырылмағанын айтты. Нысанның техникамен және жұмыс күшімен толық қамтамасыз етілмеуі жобаның жүзеге асуына кедергі келтіріп отырғаны атап өтіліп, тиісті шаралар қабылдау тапсырылды.
Баспасөз қызметінің мәліметінше, Бектенов теміржол вокзалдарын жаңғырту жұмыстарының да баяу жүріп жатқанын сынға алып, құрылыс-монтаждау жұмыстарын ағымдағы жылы аяқтауды тапсырды.
Бұдан бөлек, кеңес барысында Ақтау – Баку бағыты бойынша қатынайтын 6 контейнер тасымалдаушы кемені сатып алу рәсімдерінің созылып кеткеніне назар аударылып, жаңа көлікті аталған бағытқа шығару жұмыстарын жеделдету тапсырылды.
Сондай-ақ, шағын авиацияға арналған әуе кемелерін сатып алу мәселелерінде де кемшіліктер бар екені айтылды. Осыған байланысты мұндай әуе кемелеріне мұқтаж авиакомпаниялар үшін қаржыландыру тетіктерін жетілдіру тапсырылды.
«Жұмыстың қарқынын жеке өзім бақылауда ұстаймын. Біздің міндет – барлық бағыт бойынша күш-жігерді жұмылдыру», – деді Премьер-министр.
