Таллин. 17 сәуір. ИНТЕРФАКС – Балтық жағалауы елдері Rail Baltic теміржол қатынасының құрылысын 2030 жылға дейін аяқтауды жоспарлап отыр.
«Бүгінгі кездесуде біз Rail Baltic жобасын қайтарымсыз ету мәселесіне баса назар аудардық. Біз трасса құрылысын 2030 жылға қарай аяқтау бағытын ұстануға уағдаластық», — деді Эстония Премьер-министрі Кристен Михал баспасөз мәслихатында.
Премьер-министр: «Rail Baltic – бұл жай ғана теміржол емес, бұл біздің Еуропамен байланысымыз», — деп атап өтіп, бұл теміржол желісі өңірдің НАТО-дағы одақтастарымен байланысын нығайтатынын және альянстың шығыс қанатын қамтамасыз ететінін жеткізді.
Оның айтуынша, Эстонияның 2026 және 2027 жылдарға арналған қаржыландыру жоспарлары бар және мемлекет 2030 жылға қарай қойылған міндетті орындайды. Михал алдағы жылдары қосымша қаражат қажет болуы мүмкін екенін де жоққа шығарған жоқ.
Латвия Премьер-министрі Эвика Силиня өз кезегінде қаржыландырудың тапшылығына сілтеме жасай отырып, «ауқымды жоспарлардан сәл де болса шынайы жағдайға оралуға» шақырды.
«Латвияда халық шығындарды азайтуды талап етуде, сондықтан біз әзірленген жоспарлардың кейбір бөліктеріне өзгерістер енгіздік. Біз барлық бөлімдер бойынша жобаларды орындадық, егер жобада қандай да бір өзгеріс болса, ол тек шығындарды азайтуға қатысты болады», — деді Силиня.
Балтық елдері үкімет басшыларының кездесуі жұма күні Таллинде өтуде.
Rail Baltic — Балтық жағалауы елдерін еуропалық теміржол желісіне біріктіруге бағытталған инфрақұрылымдық жоба. Ол Таллиннен Варшаваға дейінгі жолаушылар мен жүк тасымалына арналған теміржол қатынасын қарастырады.
