Астана. 21 сәуір. ИНТЕРФАКС-ҚАЗАҚСТАН – Астана мен Ұлан-Батыр алдағы бірнеше жыл ішінде екі ел арасындағы тауар айналымын қазіргі 130 млн доллардан 500 млн долларға дейін жеткізуді жоспарлап отыр. Бұл туралы Қасым-Жомарт Тоқаев мәлімдеді.
«Өткен жылы Қазақстан мен Моңғолия арасындағы тауар айналымы 130 млн долларды құрап, 7,7%-ға артты. Елдеріміздің экономикалық әлеуетін ескерсек, бұл көрсеткішті одан әрі ұлғайтуға толық мүмкіндік бар. Осыған байланысты біз алдағы бірнеше жылда тауар айналымын 500 млн долларға жеткізуді мақсат етіп отырмыз», – деді Мемлекет басшысы Моңғолия Президентімен кеңейтілген құрамдағы келіссөздер барысында.
Президенттің айтуынша, бұл мақсатқа қол жеткізу үшін өзара сауда құрылымын әртараптандырып, экономикалық ынтымақтастыққа кедергі келтіретін тосқауылдарды барынша азайту қажет.
Өз кезегінде Ухнаагийн Хурэлсух Қазақстаннан жеміс-жидек, көкөніс, бидай және жоғары сапалы тұқым жеткізуді ұлғайту бағытында ынтымақтастықты кеңейту мүмкіндігі бар екенін атап өтті.
