Вашингтон. 7 мамыр. ИНТЕРФАКС — Біріккен Араб Әмірліктерінің «Abu Dhabi National Oil» (Adnoc) мемлекеттік мұнай-газ компаниясы Ормуз бұғазындағы блокадаға қарамастан, сұйытылған табиғи газ (СТГ) экспортын тоқтатқан жоқ. «Bloomberg» агенттігінің бейсенбі күнгі хабарлауынша, компания танкерлердің нақты орналасқан жерін жасыру арқылы газ тасымалының шағын ағынын сақтап отыр.
Агенттіктің кемелерді бақылау деректері мен жеке дереккөздеріне сүйенсек, жуырда Дас аралындағы Adnoc айлағынан жүк тиеген кемінде екі танкер Ормуз бұғазынан өту үшін бағыт-бағдар беру жүйесін өшіріп тастаған. Бұл әрекет аймақта соғыс басталғаннан кейін жүктерді қауіпсіз алып шығу үшін жасалған.
Спутниктен түсірілген суреттер кемелердің терминал маңында тұрғанын растайды. Алайда бірде-бір танкер өз координаттарын жариялап отырған жоқ. Сонымен қатар, кеме қатынасының мониторингі Adnoc-тың тағы үш бос танкері бұғаздың шығыс кіреберісіне жеткен соң сигнал беруді тоқтатқанын анықтады.
Дереккөздердің айтуынша, бұл кемелер Парсы шығанағына байқатпай кіріп, жүк тиеу үшін бағыттарын әдейі жасырып отыр.
Ормуз бұғазы 28 ақпанда АҚШ пен Израильдің Иранға қарсы әскери қимылдары басталғалы бері іс жүзінде жабық тұр. Қазіргі уақытта Иран да, АҚШ та әлемдік энергия ресурстарының бестен бір бөлігі өтетін осы су жолын бірдей блокадаға алған.
«Bloomberg» мәліметінше, энергетикалық компаниялардың түрлі айла-шарғыларына қарамастан, жеткізілім көлемі соғысқа дейінгі деңгейден әлдеқайда төмен. Қазіргі таңда күніне орта есеппен тек үш жүк кемесі ғана жөнелтіліп жатыр.
