Астана. 12 мамыр. ИНТЕРФАКС-ҚАЗАҚСТАН – Қасым-Жомарт Тоқаев «Қазақстан Республикасының орта білім беру жүйесіне жасанды интеллект енгізу жөніндегі шаралар туралы» жарлыққа қол қойды. Бұл туралы сейсенбі күні мемлекет басшысының баспасөз қызметі хабарлады.
«Жарлықтың негізгі мақсаты – жасанды интеллектінің жедел дамуы жағдайында Қазақстан Республикасының орнықты дамуын қамтамасыз ету, сондай-ақ адами капиталдың негізгі элементі ретінде заманауи әрі инновациялық білім беру жүйесін қалыптастыруға жағдай жасау», – делінген баспасөз қызметінің хабарламасында.
Жарлыққа сәйкес, 2026 жылғы 1 шілдеге дейін үкімет 2026–2029 жылдарға арналған орта білім беру жүйесіне жасанды интеллектіні кеңінен енгізу жөніндегі кешенді іс-шаралар жоспарын бекітуі тиіс. Құжатта дербестендірілген оқыту тетігін қалыптастыру, цифрлық инфрақұрылымды дамыту, педагог кадрларды даярлау және оқушылардың жеке деректерін қорғау мәселелері қамтылады.
«Жарлықта Жасанды интеллектіні дамыту жөніндегі кеңес мүшесі Ли Кай-Фунің ұсынымдарын практикалық жұмыста пайдалану көзделген. Сонымен қатар үкімет 2026 жылғы 1 маусымға дейін орта білім беру саласындағы пилоттық жобаны іске асыру бойынша нақты ұсыныстар енгізуі тиіс. Кейін бұл тәжірибе ауқымды деңгейде таратылмақ. Аталған жаңашылдықтар қала және ауыл мектептері арасындағы білім сапасы алшақтығын азайтуға бағытталған», – деп атап өтті баспасөз қызметі.
Биылғы 1 тамызға дейін пилоттық жоба аясында мектептерді техникалық жарақтандыру, оның ішінде тұрақты жоғары жылдамдықтағы интернетпен қамтамасыз ету жоспарланған. Ал 1 қыркүйекке дейін орта білім беру жүйесінде жасанды интеллектіні қолдану стандарттары бекітіледі.
«Сондай-ақ 2026 жылғы 1 қыркүйекке дейін педагогтердің үздіксіз кәсіби дамуын қамтамасыз ететін және жасанды интеллект технологияларын білім беру процесінде мұғалімнің кәсіби қызметін алмастырмайтын, қосымша тиімді құрал ретінде пайдалануды көздейтін шаралар жоспары қабылданады», – делінген хабарламада.
«Қазақстан Республикасының орта білім беру жүйесіне жасанды интеллект енгізу жөніндегі шаралар туралы» жарлыққа 12 мамыр, сейсенбі күні қол қойылды және құжат қол қойылған күннен бастап күшіне енді.
