Астана. 13 мамыр. ИНТЕРФАКС-ҚАЗАҚСТАН – 2026 жылдың қаңтар–сәуір айларында Қазақстан шамамен 5 млн тонна мұнай өндіре алмады. Бұл туралы вице-премьер Серік Жұманғарин мәлімдеді.
«Төрт айдың қорытындысы бойынша экономиканың өсімі 3,6 пайыз болды. Бұл ретте осы кезеңде біз шамамен 5 млн тонна мұнай өндіре алмадық», – деді Жұманғарин сәрсенбі күні Мәжіліс кулуарында.
Оның бағалауынша, егер аталған көлем өндірілген жағдайда, елдің жалпы ішкі өнімінің өсімі 6 пайыздан жоғары болар еді.
Бұған дейін Энергетика министрі Қазақстанда 2026 жылдың қаңтар–наурыз айларында мұнай және газ конденсатын өндіру көлемі 2025 жылдың сәйкес кезеңімен салыстырғанда 20 пайызға төмендеп, 24,6 млн тоннадан 19,7 млн тоннаға дейін азайғанын хабарлаған болатын.
Министрдің мәліметінше, мұнай-газ саласындағы көрсеткіштердің төмендеуіне Каспий құбыр консорциумы (КҚК) жүйесіндегі және Теңіз кен орнындағы жағдай әсер еткен.
Билік өкілдері бірінші тоқсанда жоғалған мұнай өндіру көлемін жыл соңына дейін өтеуге үміт білдірген еді.
Еске салсақ, Қазақстанның 2026 жылға арналған әлеуметтік-экономикалық даму жоспары бойынша жыл қорытындысында 100,5 млн тонна мұнай өндіру көзделген. Алайда Энергетика министрі Ерлан Ақкенженов КҚК мен Теңіздегі жағдайларға байланысты өндіріс көлемі 96–98 млн тонна шамасында болады деп болжап отыр.
Қаңтар айында Теңіз кен орнында трансформаторлар өртеніп, соның салдарынан 19 қаңтарда мұнай өндіру тоқтатылған болатын. Мұнай өндіру 31 қаңтарда қайта жанданды. Ал 11 наурызда министр Ерлан Ақкенженов қаңтардағы оқиғадан кейін Теңіздегі мұнай өндіру тәулігіне 120 мың тонна деңгейінде қалпына келгенін мәлімдеді.
Жыл басында Каспий құбыр консорциумы жүйесі арқылы мұнай тасымалы ұшқышсыз ұшу аппараттарының шабуылдарына байланысты шектелген еді. Бұл жүйе қазақстандық мұнай экспортының негізгі бағыты саналады және құбыр арқылы тасымалданатын қазақстандық мұнай көлемінің 80 пайыздан астамы осы бағытқа тиесілі.
