Астана. 14 мамыр. ИНТЕРФАКС-ҚАЗАҚСТАН — Қазақстан мен Түркия арасында ешқандай қайшылық пен келіспеушілік жоқ. Түркия президенті Режеп Тайип Ердоғанның қазіргі сапары екі ел арасындағы ынтымақтастыққа жаңа серпін береді. Бұл туралы Қазақстан президенті Қасым-Жомарт Тоқаев мәлімдеді.
«Сіздің бұл жолғы сапарыңыз екі ел арасындағы ынтымақтастыққа қуатты серпін беретіні сөзсіз. Қазақстан мен Түркияны әрдайым достыққа, бауырластыққа негізделген қатынас және мәңгілік серіктестік байланыстырады. Біздің мемлекеттер арасында ешқандай қайшылықтар мен келіспеушіліктер жоқ», — деді Тоқаев Ердоғанмен шағын құрамдағы келіссөз барысында.
Қазақстан президенті Түркия басшысын жылы қарсы алып, оның мемлекеттік сапарын «ерекше маңызға ие тарихи оқиға» деп атады.
Тоқаев өткен жылы Түркияға жасаған ресми сапары барысында қол жеткізілген келісімдерді де атап өтті.
«Анкарада Жоғары деңгейдегі стратегиялық ынтымақтастық кеңесінің бесінші отырысы өтті. Оның қорытындысы бойынша өте маңызды шешімдер қабылданды. Бүгін кеңестің алтыншы отырысы өтеді, сондай-ақ ірі бизнес-форум ұйымдастырылады. Сізбен бірге Астанаға беделді делегация келді. Сапарыңыз табысты болады деп сенемін. Бүгін біз өзара ынтымақтастығымыздың жарқын болашағына қарай үлкен қадам жасап отырмыз», — деді Тоқаев.
Өз кезегінде Түркия президенті Қасым-Жомарт Тоқаевқа жылы қабылдау үшін алғыс білдірді.
«Ең алдымен, ата-баба жеріне келуге шақырғаныңыз үшін ризашылығымды білдіремін. Сіз бізге ерекше қонақжайлық танытып отырсыз. Қазақстан әуе кеңістігіне кірген сәттен бастап ұшақтардың біздің делегацияны алып жүруі бізге зор әсер қалдырды. Мұны ұмытпаймыз. Бүгінгі сапар бауырлас халықтарымыздың бірлігін нығайтуға елеулі үлес қосатынына сенімдімін», — деді Ердоған.
Түркия президенті Қазақстанға мемлекеттік сапармен келді.
