Вашингтон. 14 мамыр. ИНТЕРФАКС — Қытай АҚШ-тың Иранға қарсы әскери операциясын өз позициясын нығайту үшін пайдалана алды. Бұл туралы The Washington Post басылымы америкалық шенеуніктерге сілтеме жасап хабарлады. Олар құпия барлау есебімен таныс болған.
Басылым мәліметінше, құпия талдау есебінде Қытайдың АҚШ-тың Иранға қарсы соғысын әскери, экономикалық, дипломатиялық және басқа да салаларда Вашингтоннан басымдық алу мақсатында пайдаланғаны көрсетілген.
Әскери барлау бұл есепті Біріккен штаб бастықтары комитетінің төрағасы Дэн Кейнге осы аптада жолдаған. The Washington Post бұл құжаттың АҚШ президенті Дональд Трамптың Қытайға сапары кезінде жария болуы «өте сезімтал кезеңге» сәйкес келгенін атап өтті.
Америкалық тараптың мәліметінше, АҚШ пен Израиль операциясы басталған 28 ақпаннан бері Қытай Иран шабуылдарына ұшыраған Парсы шығанағы елдеріне қару-жарақ сатқан. Сонымен қатар операция АҚШ-тың Тайвань төңірегіндегі ықтимал қақтығыс жағдайында қажет болуы мүмкін қару қорын азайтып, Таяу Шығыстағы америкалық базалар мен техникаларға зиян келтірген.
Осы аралықта Қытай АҚШ-тың әскери қақтығысты қалай жүргізіп жатқанын бақылап, болашақтағы өз операцияларын жоспарлауға мүмкіндік алған.
Бұдан бөлек, Қытай Ормуз бұғазының жабылуынан кейін энергетикалық қиындықтарға тап болған елдерге қолдау көрсеткен. Атап айтқанда, Бейжің Таиланд, Аустралия және Филиппиннің энергия қажеттіліктерін қамтамасыз етуге көмектесіп, «жасыл» энергетика технологияларына ұзақмерзімді қолжетімділік ұсынып отыр.
Басылым Трамптың бұған дейін Ормуз бұғазының жабылуы Қытай үшін үлкен проблема болатынын айтқанын еске салды. Себебі Бейжің Таяу Шығыс мұнайына тәуелді. Алайда америкалық барлау Қытайдың ірі стратегиялық қорлары мен жаңартылатын энергетикасының арқасында жеткізілімдегі үзілістерге төтеп бере алғанын анықтаған.
Сонымен қатар барлау қызметі Қытай билігінің Иранға қарсы әскери операцияға байланысты кең таралған наразылықты АҚШ-ты сынау үшін пайдаланғанын да атап өткен.
