Астана. 21 мамыр. ИНТЕРФАКС-ҚАЗАҚСТАН — Қазақстан Республикасының Парламенті Мәжілісі бейсенбі күнгі жалпы отырыста «Қазақстан Республикасының кейбір заңнамалық актілеріне нотариат қызметі мәселелері бойынша өзгерістер мен толықтырулар енгізу туралы» заң жобасын бірінші оқылымда қарап, мақұлдады.
Түзетулер депутаттар бастамасымен әзірленген және мемлекеттік бақылау жүйесін жетілдіруге бағытталған.
Мәжіліс қорытындысында атап өтілгендей, қазіргі бақылау тетігі Кәсіпкерлік кодексінің нормаларына негізделгенімен, нотариаттың жария-құқықтық мәртебесін толық ескермейді. Осыған байланысты мемлекеттік бақылау жүргізу тәртібін тікелей «Нотариат туралы» заңда бекіту ұсынылып отыр. Онда тексерулердің негіздері мен рәсімдері айқындалып, әділет органдарының өкілеттіктері кеңейтіледі.
Мәжіліс мәліметінше, заң жобасында нотариустың лицензиясын алты айға дейін тоқтата тұруға қосымша негіздер енгізіледі. Мұндай шаралар нотариус «Дербес деректер және оларды қорғау туралы» заң талаптарын бұзған жағдайда қолданылуы мүмкін.
Сонымен қатар нотариат қызметімен айналысуға берілген лицензияның күші мына жағдайларда уақытша тоқтатылады: нотариус мемлекеттік қызметке кіргенде, Парламент немесе мәслихат депутаты болып сайланған кезде.
Заң жобасында электрондық құжаттар мен электрондық цифрлық қолтаңба талаптарын сақтау бөлігіндегі цифрлық заңнаманы бұзған нотариустарды лицензиядан айыру да қарастырылған.
Бұдан бөлек, құжатта нотариалдық электрондық архивті қалыптастыру тәртібі бекітіледі. Сондай-ақ нотариат қызметіне лицензиясы болғанымен, бес жыл және одан да ұзақ уақыт мамандығы бойынша жұмыс істемеген тұлғалар үшін біліктілікті міндетті түрде арттыру талабы енгізіледі.
