Астана. 28 мамыр. ИНТЕРФАКС-ҚАЗАҚСТАН – Қазақстан Парламенті Мәжілісі бейсенбі күнгі пленарлық отырыста «Қазақстан Республикасының Үкіметі мен Өзбекстан Республикасының Үкіметі арасындағы қазақ-өзбек мемлекеттік шекарасының режимі туралы келісімді ратификациялау туралы» заңды қабылдады.
Келісімнің негізгі мақсаты – екі елдің шекара маңындағы аймақтарында қолданылатын тәртіп ережелерін айқындау. Атап айтқанда, құжат мемлекеттік шекараны күтіп-ұстау, адамдар мен көлік құралдарының Қазақстан–Өзбекстан шекарасынан өтуі, сондай-ақ жүк пен өзге де мүліктің қозғалысына қатысты мәселелерді реттейді.
Сонымен қатар келісімде шекаралық белдеу мен шекаралық суларда шаруашылық, кәсіпшілік және өзге де қызмет түрлерін жүзеге асыру тәртібі, оларды пайдалану қағидалары, мемлекеттік шекарадағы оқиғаларды реттеу тетіктері, Қазақстан–Өзбекстан мемлекеттік шекарасы мен шекара маңындағы аумақтар үстінен ұшуларды жүзеге асыру тәртібі, сондай-ақ қоғамдық-саяси, мәдени және өзге де іс-шараларды өткізу мәселелері қарастырылған.
Келісімді іске асыру халықаралық шарттар мен ұлттық заңнамаға сәйкес екі мемлекеттің бірлескен іс-қимылы арқылы қамтамасыз етіледі.
Заң Қазақстан Парламентінің Сенатына қарауға жолданды.
