Хельсинки. 4 маусым. ИНТЕРФАКС – Финляндия Ресеймен шекараны жабық күйде қалдыру туралы шешім қабылдады. Бұл туралы бейсенбі күні елдің Ішкі істер министрлігі хабарлады.
«Үкімет шекарадағы өткізу бекеттерін жабу және халықаралық қорғау сұрауларын қарауды орталықтандыру туралы шешімнің қолданылу мерзімін ұзартты. Шешім қосымша хабарламаға дейін күшінде болады», – делінген ведомствоның баспасөз хабарламасында.
Финляндия мен Ресей арасындағы құрлықтағы шекарадағы өткізу бекеттері 2023 жылғы 15 желтоқсаннан бері жабық тұр. Халықаралық қорғау алу туралы өтініштерді қарау Финляндияның сыртқы шекарасындағы ашық әуе және су өткізу бекеттерінде орталықтандырылған тәртіппен жүргізіледі.
Финляндия ІІМ мәліметінше, үкімет қабылдаған шаралар күтілген нәтижеге қол жеткізген. Атап айтқанда, елдің шығыс шекарасы арқылы жүзеге асырылатын «инструменталдандырылған көші-қон» уақытша тоқтатылған.
Фин тарапының пікірінше, мұндай көші-қон ағындары Ресейдің Финляндия мен Еуропалық Одақтың қауіпсіздігі мен әлеуметтік тұрақтылығына ықпал ету және қысым көрсету құралдарының бірі болып табылады.
Финляндия билігі бұған дейін шығыс шекарадағы барлық сегіз жолаушылар өткізу бекетін бірнеше рет жабу туралы шешім қабылдаған болатын. Ресми Хельсинки бұл шешімді Ресей тарапы үшінші елдерден келген мигранттардың Финляндия шекарасына жаппай келуіне жағдай жасап отыр деген уәжбен түсіндірді.
Фин билігі мұны Ресей ұйымдастырған «гибридтік шабуылдардың» бір түрі және ұлттық қауіпсіздікке төнген қатер ретінде бағалайды.
