Астана. 6 маусым. ИНТЕРФАКС-ҚАЗАҚСТАН – Қазақстандағы билеуші Amanat партиясы Президент реформаларын іске асыру мақсатында елдің барлық қоғамдық-саяси күштерін күш біріктіруге шақырған мәлімдеме қабылдады.
Мәлімдемеде Мемлекет басшысының елдің барлық прогрессивті күштерін жалпыұлттық құндылықтар мен мақсаттар төңірегінде топтасуға үндегені атап өтілген.
«Amanat партиясының Саяси кеңесі бұл үндеуді толық қолдайды. Ауқымды реформаларды табысты жүзеге асыру үшін саяси партиялардың, азаматтық қоғамның, сарапшылар қауымдастығының, ғылым, білім, мәдениет, бизнес өкілдерінің, жастардың және ел тағдырына бейжай қарамайтын барлық азаматтардың әлеуетін біріктіру қажет деп санаймыз. Amanat партиясы әрдайым президенттік бастамалардың алдыңғы қатарында болды. Бүгінде біз барша жұртшылықты Президент Қасым-Жомарт Тоқаев көтерген бастаманы қолдап, күш-жігерді біріктіріп, Әділетті әрі Прогрессивті Қазақстанды құру жолында бірлесе еңбек етуге шақырамыз», – делінген құжатта.
Партияның Саяси кеңесі отырысында сөйлеген сөзінде Amanat төрағасы, Ерлан Қошанов жаңа Конституцияда көзделген мақсаттарды жүзеге асыру оңай міндет емес екенін айтты.
Оның пікірінше, бұл жұмыстарды жеке күшпен орындау мүмкін емес, сондықтан қазіргі кезеңде қоғамға жауапкершілік пен бірліктің үлгісін көрсету маңызды.
Қазіргі уақытта Қазақстанда сегіз саяси партия ресми тіркелген. Олар: Amanat, Ақ жол, Қазақстан Халық партиясы, Ауыл, Жалпыұлттық социал-демократиялық партия, Байтақ, Respublica және жуырда тіркелген Әділет партиялары.
Қазіргі Парламент құрамында аталған партиялардың алтауының өкілдері бар.
